Máttasámi mánáid-tv oažžu 300 000 ruvnnu
SÁPMI: Sámediggeráđđi juolluda 300 000 ruvnno doarjjan «Sööfe» buvttadeapmái, mii lea Máttasámi mánáid-tv ráidu boarráset mánáid várás.
Mánáid-tv ráidu «Sööfe»
TMM produksjoner AS buvttadansearvi lea ohcan Sámedikkis doarjaga buvttadit Máttasámi mánáid-tv ráiddu «Sööfe». Ráiddus lea sáhka gullevašvuođas guovtti sierra kultuvrii, gos čuovvut 11-jahkásaš Sööfe, guhte ráiddus álggos lea eanas «stuorraservodat-norgalaš» ja loahpas šaddá čeavlás máttasámi nieidan geas leat garra dovddut árbevirolaš boazoeaiggáteallimii.
– Mii leat ilus go sáhttit addit doarjaga dán prošektii. Ráiddus lea gelddolaš fáddá, maid ollu sámi mánát dovdájit. Ráidu ovdan buktá gova sámi kultuvrras gaskal árbevirolaš ja ođđa áiggi. Dat čájeha rikkis sámi kultuvrra, ja lea deaŧalaš ovdan buktin sihke sámi ja ii sámi mánáide, dadjá sámediggeráđđi Mikkel Eskil Mikkelsen preassadieđáhusastis.
Mediafálaldat sámegillii
Sámediggeráđi juolludus dávista Muohtačalmmit-álginjulggaštusa vuoruhemiide, mas earret eará deattuhuvvo man deaŧalaš lea sihkkarastit dan ahte sámi gielat gullojit ja geavahuvvojit. Sámediggeráđđái lea maiddái deaŧalaš fuolahit buori mediafálaldaga sámi mánáide ja nuoraide.
– Sámi mánát ja nuorat dárbbašit mediafálaldaga mas oidno ja vuhtto sin iežaset duohtavuohta sin gielaide, áŋggirdeaddji vuogi mielde. Dat nanosmahttá mánáid identitehta ja doaibmá maiddái giellaarenan. Danne lea hui deaŧalaš láhčit dákkár prošeavttaid main lea buorre kvalitehta, dadjá Mikkelsen.
Ovttasbargu
Máttasámi mánáid-tv ráidu «Sööfe» lea TMM produksjoner AS ja NRK Super ja NRK Sámi ovttasbargu, ja ráidu sáddejuvvo NRK:S. Dát seamma buvttadansearvi lea maiddái duogábealde Máttasámi mánáid-tv ráiddu «Laara ja Leisa», mii maiddái sáddejuvvui NRK:S.