Ássanmoktabálkkašupmi juhkkojuvvon
Gaskavahkku mearridii Finnmárkku fylkkagieldda fylkalávdegoddi Bjørg Masternesii addit dán jagáš ássanmoktabálkkašumi, go son áŋgirit lea bargan Gussanjárgga ovddas 2010 rájes.
Masternes lea bargan sihke čuoiganlahtuid, turvraláhtuid ja skohtermáđijaid ovddas, ja huksen dolastangoavddi čuoiganláhtuid lusa.
– Lei hui somá oažžut dákkár bálkkašumi. Justte dál lean bassame campingbáikki lanjaid, mii ii leat iešalddis nu somá, muhto movttiidahttá joatkit dainna bargguin go ožžon dákkár bálkkašumi, lohká Bjørg Masternes preassadieđáhusas.
Áŋgirvuohta ja movttegis bálvalusdáhttu
Ássanmoktabálkášupmi juhkkojuvvo doaimmaid ja aktivitehtaid vuođul mat leat leamaš mielde lasiheame ássánmovtta Finnmárkkus, main lea buorre beaggin ja mat leat dahkan Finnmárkku eambbo geasuheaddjin.
– Lea earenoamáš mo dát nissonolmmoš, ovttas iežas buriid vehkiiguin, lea bosson heakka gillái mii goasii lei vuolláneame. Áŋgirvuohta ja movttegis bálvalusdáhttu lea buktán buori gova Finnmárkkus, čuožžu nominašuvnnas.
Jahkásaš bálkkašupmi
Finnmárkku fylkkagielda juohká ássanmoktabálkkašupmi jahkásaččat. Dát bálkkašupmi sáhttá juhkkojuvvot joavkkuide, servviide, institušuvnnaide, organisašuvnnaide ja olbmuide fylkkas. Dasa lassiin ahte vuoiti oažžu gudni, de oažžu maiddái 30 000 ruvdnosaš šeahka. Dán jagi ledje 10 evttohuvvon vuoiti: Halgeir Fredriksen, Sørøyrocken, Vadsø Jazzklubb, Bjørg Masternes, Čáhcesullo riidenskuvla, Gávvuona gilisearvi, Lill Wenche Øyen, Hjerterom Tana, Klubbukt ja lagasbirrasiid gilisearvi ja Girkonjárgga Ambulánsabása.