Rahpet vejolašvuođa doarjut girjebussiid njeljiin miljovnnain
Sámedikki eanetlohku bivdá sámediggeráđi šiehtadallat girjebusseovddasvástideddjiiguin, gávdnan dihte ođđa doarjjaortnega.
Sámedikki bajásšaddan-, fuolahus- ja oahppolávdegotti jođiheaddji Márjá-liissá Partapuoli deattuha evttohus lea ain álgodásis, muhto mearkkašupmi rahpá vejolašvuođa ahte ráđđi oažžu ráđđádallat gielddaiguin ja fylkkagielddaiguin gávdnat čovdosa.
– Eanetlogu árvalus, man ulbmil lea ovddidit ja buvttadit girjjálašvuođa buot geavaheddjiide ođđa gaskaomiid bokte, lea ain álgodásis. Muhto jus girjebusseovddasvástideaddjit háliidit váldit stuorit ovddasvástádusa ja háliidit gávdnat buoret ruhtadančovdosiid, de mii leat gárvásat árvvoštallat vejolaš doarjjaortnegiid. Danin bivdit Sámediggeráđi ráđđádallat fylkkagielddaiguin ja gielddaiguin, geahččandihte makkár dáhttu sis lea, dadjá Márjá-liissá Partapuoli (NSR-SÁB).
Áigot ain luvvet 9,5 miljon ruvnnu
Sámediggi juolluda dál 9,5 miljon ruvnnu sámi girjebussiide, muhto eanetlohku lea mearridan čuovvulit sámediggeráđi mearrádusa, luvvet dan ruđa, nannen dihtii sámi girjjálašvuođa buvttadeami ja gaskkusteami.
Eanetlogu mearkkašumis lea biddjon eaktun šiehtadallamii ahte Sámediggi ii sáhte guoddit boahtteáigge ođasmahttingoluid bussiide, ja ahte doaibmadoarjja juolludeapmi juohke bussii ii galgga leat eanet go 500 000 ruvnnu.
Leat gávcci girjebusse mat ožžot dál Sámedikkis doarjaga.
– Mii áigut várret ruđa girjebussiide, muhto vissis supmi. Mearkkašumis čuožžu eanemus 500.000 ruvnnu jahkái, juohke bussii, dadjá Márjá-liissá Partapuoli.
Váldán duođas signálaid
Márjá-liissá Partapuoli čilge duogáš mearkkašupmái lea go leat ollu reakšuvnnat boahtán áššis, sihke fylkkagielddas ja muđuid Sámis.
– Dan mii gal diđiimet ahte girjebusse lea dehálaš muhtun guovlluide, olmmoš gal ádde ahte olbmot reagerejit. Mii leat váldán duođas signálaid maid busseeaiggádat leat ovddidan, ahte sis livčče dáhttu gávdnat eará vuogi mo doarjut girjebussiid ja dan leat mii čuovvulan dál, lohká Partapuoli ja lasiha sin áigumuš lea ahte busseeaiggádat galget ieža stuorámus oasi máksit, muhto ahte Sámediggi lea veahkkin.
Jorggu ášši
Sámedikki Bargiidbellodaga parlamentáralaš jođiheaddji Ronny Wilhelmsen ii loga mearkkašumi doarvái, ja deattuha sin oaidnu áššis lea ahte lea lunddolaš ahte Sámediggi juolluda dan oasi maid otne ge juolluda.
– Mu mielas galggašedje doalahit áššái, mii lea sámi girjjálašvuohta. Doallat dan fokusa, iige seaguhit girjebussiid áššái. Jáhkán ledje oažžut stuorát eanetlogu geahččat ođđa doarjjaortnegiid Sámi girjjálašvuhtii ja digitaliseremii. Mu mielas lea veaháš jorgut go dál áigot gávdnat ođđa doarjjaortnegiid girjebussiide, lohká Wilhelmsen.