– II DÁT LEAT jierbmeolbmo dahku Miessi báhččon hávláriin
Nuorta-sállana boazodoalli Johan Anders Bongo lea fas gávdnan miesi mii lea hávláriin báhččon sin orohagas. Muhto politiijaide gal ii loga ávkki váidit.
Boazodoalli Johan Anders Bongo Nuorta-sállanis muitala son fuomášii miesi go lei vuodjime ealu Hellefjord ja Skarvfjordguovllus sin orohagas mannan lávvordaga.
– Fuomášin giikaniin ahte miesis orru juoga sivva go vázzá nu árte- git. Go mun de báhčen dan ja njuvven, oidnen ahte erttegis ledje hávllat, miehtá gilgga. Lea hui unohas mu mielas go bohccot njuolgut biidnahuvvet dáinnalágiin. Dat dat lea vearrámus dán áššis, dadjá Bongo.
Ovdal dáhpáhuvvan
Johan Anders Bongo lea ovdal vásihan seamma Nuorta-sállanis, gos sis lea birrajageguohtun. Ávvir čálii 2013:s go Bongo gávnnai miesi hávlaráiggiiguin. Dalle juo balai son rievssatbivdit dat ledje báhčán dan hávláriin. Hávláriin ii leat oba lohpi ge báhčit bohcco.
– Jurddašin dalle ahte lea dušše okta dáhpáhus. Muhto go fas dáhpáhuvvá seamma, de balan ahte doppe sáhttet leat vel eambbo bohccot maid leat báhčán belohahkii hávláriin, maid eat leat oba fuomášan ge, dadjá son.
Navdá rievssatbivdiid dahkun
Bongo ii jáhke ahte báikki olbmot barget diekkáriid, go sis eai leat makkárge gaskavuođat singuin, muhto baicca lulli rievssatbivdit mat leat boahtán dohko. Son leat maid gullan ahte doppe bivdet beatnagiiguin, vaikko dat ii leat lohpi sin birrajagi orohagas.
– Jurddašan ahte jus rievssat lea leamaš miesi ja bivdi gaskkas, ii dan aŋkke ábut bávkalit summal. Dat gal lea vuođđooahppu. Lea lohpi oaivvi maid atnit go bivdá. Sáhttá gal maid šaddan dáhpin ahte muhtin rievssatbivdit doivot sii sáhttet báhčit misiid maid dáppe. Ja mun lean ge álgán vehá čuovvut mielde bivdiid mat guottašit stuora seahkaid sealggis, jus dat doivot mii eat leat ieža ealu luhtte. Muhto ii min eallu leat veaiddalas, jus dan doivot. Mis lea bearráigeahčču, dadjá Bongo.
Son ii loga oaidnit eará čovdosa go gieldit rievssatbivddu sin orohagas, jus ná fal joatká.
Ii oainne ávkki váidimis
Ovddit háve dieđihii son politiijaide, muhto dál ii leat gillen, go ii leat oaidnán das ávkki.
– Lean gávnnahan ahte politiijat eai oba beroš ge. Dat leat nu gávnneheamet ja atnet návccaid áibbas eará áššiide. Mii leat viggan dálvet maid dieđihit dáppe vudjet skuteriiguin lobiheamet, muhto eai dat oro berošteame, dadjá Bongo.
Politiijain ii lean vejolašvuohta cealkit maidege áššái ovdal go Ávvir manai deaddileapmái.