– Vuorddekeahtes VUOITU
Hjerttind lea čalmmustahttán ja vuovdán bohccobierggu Davvi-norgga stuorámus borramušfestiválas álggu rájes. Mannan vahkkoloahpa faskejedje vuoittu go olbmuid mielas lei boazosámiin buoremus vuovdinbeavdi.
Mannan vahkkoloahpa lágiduvvui SMAK borramušfestivála Romssa gávpogis. Dan oktavuođas geigejuvvui Hjerttind bohccobiergobuvttadeaddjái bálkkašupmi buoremus vuovdinbeavddi ovddas.
– Lea stuora gudni oažžut dán bálkkašumi go SMAK festiválas leat olu stuora ja čeahpes borramušbuvttadeaddjit. Dán eat lean vuordán ovdagihtii go mis lea juohke jagi dušše ulbmilin čalmmustahttit bohccobierggu ja oahpahit olbmuide borrat suovasbierggu, lohká Hjerttind mieleaiggát Lars Ánte Oskal.
Searvan álggu rájes
Hjerttind njuovahaga eaiggáduššá Oskal bearaš mii gullá Stállonjárgga orohahkii Ráisavuonas. Fitnodat galleda SMAK festivála juohke jagi ja vuovdá romsalaččaide bohccobierggu.
– Mii leat leamaš mielde dan rájes go SMAK álggahuvvui. Midjiide lea dehálaš searvat dán borramušfestiválii go beassat boahtit olu olbmuid sisa čalmmustahttit iežamet fitnodaga ja buktagiid. Álggu rájes leat vuovdán suovasbiergobuktagiid ja jáhkán olbmuin leat rahpasan čalmmit suovasbierggu ja sámi borramuša ektui. Jáhkkimis leat eatnaš romsalaččat dál máistán bohccobierggu. Sii leat goit hui duhtavaččat ja orrot liikomin borramuššii. Dat lea hui somá ja movttiidahttá min bargat viidáset, čilge Oskal.
Stuorámus borramušfestivála
SMAK lea lágiduvvon Romssas 2013 rájes ja lea Davvi-norgga stuorámus borramušfestivála. Jahkásaččat galledit birrasii 70 000 olbmo festivála.
– Olu olbmot galledit vuovdinbeavddi ja vásihit ahte bohccobiergu johtá buorebut dál go dalle álggus. Sihke mii ja eará bohccobiergobuvttadeaddjit leat olu jagiid bargan buoredan dihtii bohccobiergojođu. Lea hui somá oaidnit ahte lihkostuvvat, go gieskat han faskiiga sihke Skudi rein ja Saltfjellet rein bálkkašumiid. Mis lea buohkain seamma ulbmil, ja dat lea čalmmustahttit bohccobierggu, lohká Hjerttind mieleaiggát Lars Ánte Oskal.
Bivnnut
SMAK festiválas lávejit badjel 60 vuovdinbeavddi ja daid searvvis vállje jođihangoddi vihtta borramušbuvttadeaddji maid olbmot besset jienastit buoremus vuovdinbeavdin.
– Fitnodagaid hutkáivuohta, bivnnutvuohta ja áŋgirvuohta mearrida nammaduvvojit go dán bálkkašupmái. Hjerttind nammaduvvui go oinniimet ahte vuovdinbeavddi luhtte lei guhkes ráidu ovttatládje, vuovdit leat erenomáš čábbát čiŋadan gávttiiguin ja festi- válaguossit gesset dávjá ovdan Hjerttind ja bohccobierggu go muitalit medias masa liikojit buoremusat. Hjerttind vuittii dán jienasteami buriin margiinnain, lohká SMAK festivála prošeaktajođiheaddji Hilde Grønbech-Hope.
Son lohká ahte bohccobierggus lea áibbas lunddolaš sadji SMAK borramušfestiválas.
– Bohccobiergu lea áibbas lunddolaš Davvi-norgga borramušlihtis ja livččii viehka imaš jus eat fálaše dan SMAK festiválas. Bohccobiergu lea hui bivnnut ja das lea stuora mearkkašupmi festiválii. Olbmot han vurdet ahte ožžot guovllu borramuša, dadjá son.