Árvvoštallet Deanušalddi skuvlla
Deanu gielda searvvai 2017:s riikaviidosaš prošektii «veilederkorpset», dahje sámegillii »bagadallanjoavku».
Dan oktavuođas go leat mielde bagadallanprošeavttas, de sáhttá Deanu gielda bivdit bagadallanjoavkku árvvoštallat ovtta dahje moatti gieldda skuvllain. Ovttasráđiid Deanuskuvlla rektoriin lea Deanu gielda bivdán olggobealde árvvoštallama Deanušalddi skuvllas. Árvvoštallan dáhpáhuvvá dán vahkku. Dán dieđiha Deanu gielda gieldda neahttasiiddus.
Bagadallanjaovku galgá bagadallat sihke politihkalaš dási ja hálddahusdási, ja buot skuvllat Deanus leat mielde skuvlaovdánanprošeavttas. Dan oktavuođas lea Deanu gieldda fuolahus-, bajásšaddan- ja kulturossodaga váldolávdegoddi mearridan ovdánahttinplána Deanu skuvllaide 2018-2021.
Jearahallat «buohkaid»
Bagadallanjoavkku ovddasteaddjit galget jearahallat sihke skuvlaeaiggádiid, oahpaheddjiid, ohppiid ja váhnemiid. Dasa lassin galget vel doallat čoahkkima váhnemiiguin. Árvvoštallama váldofáddá, man olggobeale olbmot čađahit, lea skuvlabiras ja relašuvnnat.
Bagadallanjoavku ovdanbuktá bohtosiid árvvoštallamis skuvlii dán vahkku loahpas. De beassá skuvla diehtit mat leat skuvlla nanu bealit ja mo skuvla sáhttá vel buorebun šaddat.
– Dat lea hui gelddolaš Deanu gildii ja earenoamážit Deanušalddi skuvlii. Skuvllas leat čeahpes jođiheaddjit, oahpaheaddjit ja oahppit, ja lea buorre buohkaide oažžut diehtit mainna galget eambbo bargat ja seammás oažžut veahki jorgalit buori guvlui dan mii sáhttá buoriduvvot, čállá fuolahusa, bajásšaddama, ja kultuvrra váldolávdegotti jođiheaddji Kristin Rajala čállosis Deanu gieldda siiddus.