– Buorre go čalmmustahttet daid áššiid
Sámi feminista Bente Owren searvvai paneladigaštallamii. Son lea ilus go magasiidna čállá sámi feministtalaš áššiid birra.
– Lei hui buorre leat oassin paneladigaštallamis. Ledjen veaháš gealdagasas mo fáddá digaštallojuvvo go akademalaš čalmmiiguin lahkonit fáttá, muhto vásihin ahte eará paneladigaštallit čájehedje vuollegašvuođa ja digaštalle áššálaččat. Dasa liikojin. Livččen sávvan ahte leimmet eambbo ságastallat kulturlonohallama birra, muhto dasa ii lean dán vuoru áigi, lohká Bente Owren maŋŋel panelaságastallama.
– Buorre go čalmmustahttet hástalusaid
Owren lea movttet go magasiidna «Fett» čállá eamiálbmogiid/ sápmelaččaid ja feminismma birra.
– Mu mielas lea hui buorre go čalmmustahttet dan oasi Norgga historjjás man eai soaitte nu oallugat olggobealde Sámi guovlluid dovdat, ja maiddái go čalmmustahttet daid hástalusaid mat dálá sámi nissoniin leat. Mu muittu mielde ii leat eará Norgga magasiidna dan ovdal dahkan, lohká Owren.
Illuda lohkat
Son ii leat vuos lohkan magasiinna, lea jur ollen bláđedit veaháš.
– Illudan lohkat ja čiekŋudit áššiide maid birra čállet. Nu go dábálaččat «Fett» magasiinnas, de leat dál maid olu iešguđetlágán fáttát. Earret eará illudan lohkat Nazila Kivis čállosa davviguovlluid nállebiologiija birra, lohká Owren.
Beaivválaččat bargá son FO fylkkačállin, mii lea mánáidsuodjaluspedagogaid, sosionomaid, suodjalandivššáriid ja čálgočehpiid fágasearvi.
Son lea bajásšaddan Čuđegiettis Porsáŋggus, ja lea mearrasápmelaš.
– Mus lea sihke sámi ja kvena duogáš, ja lean eret Norgga áidna golmmagielat gielddas, Porsáŋggus. Vaikko lean juo golbmalogi jagi orron Bergenis, de lean váimmustan finnmárkulaš, lohká son.