– Ruovdemáđii ii buvtte buriid
Muttosjávrri bálgosa jođiheaddji Osmu Seurujärvi ballá ruovdemáđii váldá sin bálgosa eatnamii go dat ludde justa sin boazodoalu guovllu Anáris.
Osmu Seurujärvi, Muttosjávrri bálgosa jođiheaddji lea vuorjašuvvan.
– Ruovdemáđii boahtá gasku min dálveguohtuma, luddešii dan gasku. Min dálveguohtun lea njelješ geainnu ja Čeavetjávrri gasku. Ii han dal dieđe mii boahtá. Dot vahágahttá jus boahtá áidi, nu go dot lea guktui beale ruovdemáđii, dalle han luddešii bálgosiid guovtti oassái. Ii dat livčče buorre Muttosjávrri bálgosii, lohká Osmu Seurujärvi.
Dat nuoskkidivčče maid luonddu, eatnama ja čáziid miehtá gaskka.
– Dat gal bilida buot daid jávrriid ja buot eatnamiid. Ja jus bohtet dakkár kemikálat ahte nuoskida luonddu. Mo dalle? lohká Osmu Seurujärvi.
Dolvot velá eambbo
Osmu Seurujärvi ballá maid go ruovdemáđii boahtá, de čuollagohtet eambbo vuvddiid ja rahpagohtet ruvkkiid go dalle lea vejolaš daid fievrredit máilmmi márkaniidda.
– Bohccobiergu gal manná toga haga. Mun oskun ahte ii leat dušše máilmmi dávviriid jođiheamen, muhto leat ruvkedoaimmat ja meahccevuovdimat ja eará. Balan sii váldet min bálgosa eatnama. Dieđus go ruovdemáđii boahtá, dalle han álget smiehttat ahte sáhttet eambbo fievrridit. Stuorra váikkuhus boazodollui. Lea rehkenastán ahte boazodoallu lea miljárdda dienas Suomas, Ruoŧas, Norggas ja Ruoššas, lohká son.