LUOHPÁ politihkas
Johan Vasara lea dieđihan ahte ii vuolgge sátnejođiheaddji evttohassan Guovdageainnu Bargiidbellodahkii ja lohká iežas luohpat olles áigge politihkkárin.
Guovdageainnu sátnejođiheaddji Johan Vasara (30) luohpá ollesáigge politihkkárin. Son ii leat go ovtta áigodaga čohkkán sátnejođiheaddjin, muhto lohká 15 jahkásažžan jo álgán politihkket.
– Lean dovdan ahte dál lea áigi geahččalit eará. Dál lea áigi laddan gárvvistit juridihka-oahpu mainna lean bargan Tromssa Universitehtas, nu ahte guođán ollesáigge-politihkkema, lohká Johan Vasara. Son muitala ovdal
geasi jo dán mearridan ja dieđihan oainnustis Bargiidbellodaga stivrii.
Badjeloaivve ollu bargu
Njeallje maŋemuš jagi lea Johan Vasara leamašan bajimuš hoavda Guovdageainnu suohkanis, suohkan lei roassodilis ja ollu áigi lea váldán njulget suohkana ekonomiija.
– Leamašan hui gelddolaš, ja álgobáliid lei badjeloaivve ollu bargu čorget suohkana ruhtadili, mii lei oalle čáhppat dalle go válljejuvvojin sátnejođiheaddjin. Sávan beassat boahtte áiggis geavahit dan gelbbolašvuođa maid lean dán áigodagas háhkan, dadjá son.
Gaskaboddosašvirgi dušše
Okta sivva manin dál luohpá lea go oaidná praktihkalaš hástalusaid árgabeaivvis, sus lea bearaš, ja go ii leat bistevaš virgi, de vásiha eahpesihkkaris dili joatkit politihkas.
– Vaikko sátnejođiheaddjevirgi lea alladássevirgi, de lea aŋkke dušše gaskaboddosaččat njeallje jahkái, mii mielddisbuktá eahpesihkkaris dili ja váttisvuođaid plánet eallima guhkit áigái, go olbmos ii leat bistevaš virgi vuođus, lohká Johan Vasara.
Giitevaš luohttámuša ovddas
Son lohká buorre dovdun dál luohpat politihkas.
– Mun lean hui giitevaš dan stuora luohttámuša ovddas maid lean ožžon Guovdageainnus, doaibmat sátnejođiheaddjin, dat lea stuora gudni man ektui lean buoremus lági mielde viggan ollašuhttit olbmuid vuordámušaid.
Nubbi sátnejođiheaddji maid heaitá
Deanu sátnejođiheaddji Frank Martin Ingilae maid heaitá politihkas, son lea golbma áigodaga leamašan sátnejođiheaddji Deanus. Son ii loga vel diehtit maid áigu bargat, muhto lohká illudit juoidá eará geahččalit.
– Lean áigá jo mearridan heaitit, in dieđe vel maid áiggon boahtte čavčča rájes bargat, muhto ammal juoidá gal fuomášan, lohká son. Ingilae lea 25 jagi politihkken ja 20 jagi leamašan Deanu gielddastivrras.