ÁVVUDEDJE illusága
Bearjadaga besse Saemien Sijte bargit viimmat ávvudit go ožžo dieđu ahte ođđa museavisti galgá huksejuvvot.
– Dál viimmat bohte illugatnjalat ja beasaimet champagne rahpat ja ávvudit buriid ságaid. Lean čirron ja čaibman, ja lea duođaid somá. Lean gal ollu váivves gatnjaliid čirron, ja dál viimmat bessen iluin čierrut, lohká movttegis Saemien Sijte direktevra, Birgitta Fossum.
2021 čavčča galgá plánas Saemien Sijte Máttasámi musea ja kulturguovddáža ođđa visti rahpat uvssaid. Bearjadaga ožžo illuságaid ráđđehusas ahte lohpiduvvo vistehuksemii 115 miljovnna ruvnnu. Boahtte jagi stáhtabušeahtas lea ráđđehus evttohan juolludit guhtta miljovnna huksemii.
– Lea hirbmat buorre beaivi, miella geahppánii, lean movttet ja dovddan ilu go viimmat maŋŋá 32 jagi rahčamuša leat ollen mollii, lohká Saemien Sijte direktevra Birgitta Fossum.
30 jagi bargu loahpahuvvon
Lei stuorradiggeáirras André Skjelstad, fylkkasuohkana áirrasguovttos Tove Evindsen ja Tore Kristiansen ja Troandima Fylkadikki joavkojođiheaddji Pål Saeter Eiden geat ovdanbukte ođđasa.
Badjelaš 30 jagi lea Saemien Sijte bargan ásahit ođđa Máttasámi musea ja kulturguovddáža Máttasámi báikái Snoasai.
Vuordá huksema álggahuvvot boahtte jagi
Vistetevnnegat leat gárvásat. Mat dál leat vel báhcán ovdal go sáhttet huksegoahtit leat detáljjat, nu go ovdamearkka dihtii el-čuggestagat, muitala Birgitta Fossum.
– Mun vuorddán ahte huksenbarggut álget boahtte jagi jo, dadjá son.
Ánssášit
Máttasámi guvlui lea hui dehálaš leamašan oažžut ođđa vistti, vai sáhttet gaskkustit Máttasámi historjjá. Birgitta Fossum muitala lea ollu áigi ja návccat mannan olahit áigumuša.
– Dál beassat bargagoahtit fágalaš bargguiguin. Máttasámi servodat ja museabargit ánssášit duođaid dán vistti, lohká son.