Gatnjalat vel golggiidedje maŋŋel go Ella Marie lávllui

Maŋŋel go Ella Marie Haetta Isaksen lei lávlon Kari Bremnesa lávlaga «E du nord», de golggiidedje gatnjalat vel.

Lávvordateahkeda «Stjernekamp» gilvvus galge oassálastit lávlut EDM (elektrovnnalaš dánsenmusihka) ja viissaid. Ella Marie lei válljen lávlut Kari Bremnesa lávlaga «E du nord» ja Dua Lipa lávlaga «New rules».

Viisasuorggis čuožžiledje olu dovddut maŋŋel go Ella Marie lei lávlon «E du nord». Ekspeartapanela Mona B. Riise fertii njieládit máŋgga geardde maŋŋel lávlaga.

– Lei áibbas earálágan go gullat Kari Bremnesa lávlume, ja lei áibbas du iežat vuohki, ja lei nu fiinnis, dajai Mona B. Riise.

Ella Marie oaččui viđeža NRK P3 «Stjernekamp» árvvoštallamis.

– Dego karaokelávlun

Edm-suoggis lávllui Dua Lipa lávlaga «New Rules. P3 árvvoštalli ii lean das liikká árvvas bircočuoggáiguin, ja attii dušše guvtteža. Árvvoštalli oaivvilda ahte musihka ja jiena gaska lei beare stuoris, ja dagahii baicca karaoke miellalági ii ge lunddolaš ovdanbuktima.

Lei Chris Holsten gii oaččui unnimus jienaid ja šattai guođđit «Stjernekamp». Boahtte háve galget Ella Marie Haetta Isaksen, Ole Børud, Alexander Pavelich ja Ulrikke Brandstorp sihke juoigat ja lávlut garrarocka.