Guovdageainnus ain vejolašvuohta
Vaikko Guovdageaidnu lea ge buot vuolemusas njealját divišuvnnas, de soaitá šaddat nu ahte besset ieža válljet čikčet go njealját vai viđat divišuvnnas boahtte jagi.
Maŋemus jagiid ii leat dáhpáhuvvan ahte buot golbma vuolemus joavkku njealját divišuvnnas leat šaddan viđat divišuvdnii. Diibmá dáhpáhuvai vel nu ge ahte sihke Guovdageaidnu ja Indrefjord, mat ledje guokte vuolemus joavkku, goappašagat doalaheigga saji njealját divišuvnnas.
– Viđat divišuvnnas leat máŋga joavkku main ii leat vuođđu eai ge oba hálit ge čiekčat njealját divišuvnnas. Mun geavahan Reaššvuona ovdamearkan, mii lea buot vuolemusas sin ossodagas, muhto dat lea áidna joavku mii sáhttá beassat bajás. Mun in dieđe in ge jáhke sin háliidit váldit saji njealját divišuvnnas, dadjá Rune Haugseth, gii lea Finnmárkku spábbačiekčan biirre ráidočiekčanhálddašeaddji.
Vejolašvuođat
Reaššvuotna (buot vuolemusas Oarje-finnmárkkus), Billávuotna (nubbin Gaska-finnmárkkus) ja Guovžajávri 2/Deatnu. Nuorta-finnmárkkus lea veaháš earalágan dilli. Jus Guovžajávri doalaha saji goalmmát divišuvnnas, de sáhttet nuppiin joavkkuin, mii vuittii viđat divišuvnna, beassat bajás. Jus Guovžajávri ii doalat saji, de lea Deatnu, mii bođii goalmmádin, mii oažžu fáláldaga.
– Lea hui stuora dásseerohus njealját ja viđat divišuvnnas. Viđat divišuvdna lea maid eambbo báikkálaš ráidočiekčan go njealját, mii fátmmasta olles Finnmárkku. Nuppi dáfus, jus dat joavkkut mat leat vuolemusas njealjat divišuvnnas háliidit viđadii, de mii gal eat bágge ovttage bissut njealját divišuvnnas, dadjá Haugseth.
Eat dieđe vel
Reaššvuona gulahallanolmmoš, Aleksander Johansen, muitala ahte sii eai dieđe vel maid sii barget go ožžot fálaldaga.
– Loahpa loahpas lea stivrra duohken váldit go mii saji njealját divišuvnnas, muhto jus munno, hárjeheddjiid, oaivila galgá čuovvut, de lea vuos beare árrat midjiide váldit saji njealját divišuvnnas. Mis lea leamaš buorre hárjehallan ja čiekčanárgabeaivi viđat divišuvnnas ja mii leat dárbbahan dan vai ráfis leat bállen hukset joavkku ja oahpásmuvvat nubbi nubbái. In jáhke mii váldit saji, baicca hukset joavkku vel buorebut vai leat gergosat čiekčat njealját divišuvnnas go mii leat doarvái buorit, dadjá Johansen.
Billávuona ja Deanu gulahallanolbmot ja hárjeheaddjit eai vástidan telefuvnna ovdal Ávvira deaddilanáiggi.