Gumpe lea ain SPEADJAME
Álggos gávdne vihtta ráppi, dál lea lohku lassánan 12 rádjái, ja siida ballá ahte gávdnojit vel eambbo.
Fieddara orohatovdaolmmoš, Per Johnny Skum, lohká eallokoahkaid ohcame eambbo ráppiid, ja son balláge ahte gávdnojit ain eambbo, go sihke goaskimat ja garjját girddašit ealu bajábealde.
– Boahtá goddit olu jus fal beassá. Gal dát lea juo beare surgat, ja midjiide lea stuora vahágin. Lea vel nu ahte eat ieža dieđe olu leaš goddán, go leat vuopme-
báikkit eat ge soaitte gávdnat visot obanassiige, lohká Skum ja joatká:
– Leat eanas njiŋŋelasat maid mii dássážii leat gávdnan. Gumpe han orru dakkár mii goddá dušše daid buoremus bohccuid. Ii bora maide, dušše speadjá.
Ohcan báhčinlobi
Gumpe lea dán rádjái goddán 19 sávzza ja lábmen guokte, dasa lassin lea goddán guoktenuppelohkái bohcco, mat dán rádjái leat gávdnon.
Per Johnny Skum lohká hupman fylkkamánniin, ja sii leat dál bargame oažžut báhčinlobi.
– Fylkkamánni ii loga soaitit nu
guhká mannat, go dán dilálašvuođas lea hoahppu oažžut báhčinlobi. Liikká ii leat vel daddjon juste galle beaivvi manná ovdal go oažžut dan, ii ge leat ávki vuodjit helikopteriin ohcat gumppe ovdal go leat juo ožžon báhčinlobi, lohká orohatovdaolmmoš.
Fylkkamánni dajai Ávvirii bearjadaga ahte lassá oažžut báhčinlobi lea oalle vuollegaš dál go gumpe lea ná stuora vahágiid dahkan.
Amas Ealli
Nubbi siiddas, gii lea vaháguvvon, lea Aslat Heandarat Eira. Ávvir deaivvadii suinna Stáda Luonddubearráigeahču garášas gos vuosttaš vihtta ráppi dárkkistuvvojedje.
– Vuosttažettiin gal lea gumpe oba amas ealli midjiide, ja diehttelasat lea váivi vásihit dákkáriid. Doppe sáhttet vaikko man ollu lápmahuvvan bohccot maid mii eat leat oaidnán. Adnošii helikopter mainna čohkke ealu vuomis duoddarii ja nu de oažžu ollislaš gova dilis, dadjá Eira.
Ballá bohccuid biidnahuvvat
Jus eai nagot čohkket ealu duoddarii, de ballá Eira ahte lápmahuvvan bohccot šaddet vahkkuid vázzit ja biidnahuvvat go daid ii leat álki gávdnat vuomis.
– Dát sáhttá dagahit stuora vahágiid oallugiidda, go doppe han leat olu siiddat min birra, ja dán háve leimmet mii vuosttaš siida geat vaháguvaimet. Mun jurddahan ahte dát návdi gal ferte gávdnot, ii ná gal sáhte diktit, dadjá son ja loahpaha:
– Návdi galggašii gávdnot jođáneamos lági mielde ja dainna gal ferte juoga dahkkot.