Gottii 55 heakka
Gumpe gottii 19 sávzza ja 36 bohcco guovtti vahkkus ovdal go báhččui.
– Lea ollu vahágiid dahkan oanehis áiggis, lohká Finnmárkku Fylkkamánne boraspireossodaga jođiheaddji Christer Michaelsen.
Christer Michaelsen muitala vuossárgga ahte gumpe mii báhččui Kárášjoga gielddas lea dássážii goddán 19 sávzza ja 36 bohcco.
– Dássážii leat duođaštuvvon 55 heakka goddon gumpii, ja lohku sáhttá dieđusge stuorrot. Sáhttet ain gávdnot ráppit mat leat goddon gumpii, lohká Christer Michaelsen.
Eai vel dieđut gumppe birra
Son ii loga diehtit guđe guovllus gumpe lea boahtán, iige man boaris dahje leat go eará dieđut gumppe birra mii báhččui.
– Ii lean nu beare stuorra gumpe, muhto dieđuid mielde maid lean ožžon de orru gumpe leamašan buori vuoimmis, dadjá son.
– Buorre vejolašvuohta oažžut dieđuid
Christer Michaelsen iige loga diehtit vel lea go gumpe registrerejuvvon ovdal vai lea go ođđa gumpe. Norggas lea ovttasbargu Ruoŧain ja muhtun muddui Suomain.
– Lea buorre vejolašvuohta oažžut dieđuid gos dát gumpe lea boahtán, jus fal lea registrerejuvvon ovdal. Soaitá maid leat nu ahte dát ealli ii leat registrerejuvvon ovdal, lohká son. Báhččon gumpe sáddejuvvo Norgga Luonddudutkaninstituhttii (NINA), gos galget iskosiid váldit.
Dábálaš ahte dálvet vuhtto
Duos dás beaggá ahte gumpe lea vuhtton Finnmárkkus. Christer Michaelsen lohká dan áibbas dábálažžan ja erenomážit Ruošša ja Suuoma rádjeguovlluin.
– Báhčaveajis, Kárášjogas, Anárjogas ja Guovdageainnus sáhttá duos dás dieđihuvvot dálvet ahte gumpe lea vuhtton, dadjá son. Finnmárkkus eai galgga leat čivgangumppet, muhto duos dás bohtet nu gohčoduvvon johttigumpet.
Christer Michaelsen čilge ahte dálvet lea álkit vuohttit, go bievlá de lea mealgat váddásit vuohttit ja fuomášit gumppe.
Ii vuhtton go okta gumpe
Christer Michaelsen ii loga sáhttit dáhkidit ahte eai leat eambbo gumppet guovllus Kárášjogas, muhto lohká luottaid maid leat guorran, de ii leat go ovtta eallis sáhka leamašan.
– Jus lei vel nubbi gumpe guovllus, de lei galgat vuohttit dan luottaid, lohká son.
2005:s báhččui maid gumpe Finnmárkus
Maŋemuš go addui sierralohpi báhčit gumppe Finnmárkkus lei 2014:s, muhto dalle ii báhččon gumpe. Maŋemuš go gumpe báhččui Finnmárkkus lei 2005:s. 2016:s vuhttui ja duođaštuvvui okta gumpe Finnmárkkus, dat gumpe gávdnui jápmán giđđat seamma jagi Álttávuonas.
– Gumpe mii gávdnui Álttá- vuonas lei jápmán lunddolaš sivaid geažil, muitala Christer Michaelsen.