Amas luossadávda áitá luossanáli

RUOŦŦA: Ruoŧa jogain ja ádjagiin fáhkka buohccájit ja jápmet luosat, čállá SVT Sápmi.

Dát dáhpáhuvvá Duortnoseanus davvin gitta Mörrumsån johkii máddin. Luosa čielgevieksái ihtet vuos ruškes ruoppit, das maŋŋá geahnohuvvá luossa ja rievdá goatnilii ja loahpas jápmá viđa – guđa beaivvi maŋŋá. Dilli lea duođalaš ja dál ballet luossanáli oalát jávkat Ruoŧas. Jagi 2013 fuomášedje vuosttaš geardde luossadávdda Mörrumsån jogas.

Dutki Mattias Holmquist muitala sii dihtet dutkama bokte sihkkarit ahte luosas váilu heakkadehálaš vitamiidna B1. Go dat váilu luosas, de ii biđe luosa immunavuogádat bissehit dávddaid ja dat čuohcá maid luosa vuoiŋŋamaččaide ja gođđamii. Muhto manin luossa šaddá dan dillái, dan ii dieđe oktage.