Ođđa olahus bearralmohkketuvrrain
Vahkku ovdal go Bearralmohkketuvrrat loahpahuvvojit de leat badjel 53.000 olbmo čađahan tuvrraid ja leat 3500 aktiivvalaš geavaheaddji.
perletur.no neahttasiiddus čállet dál ahte sii áigot šaddat vel buorebut. Ii dušše stuorábut, muhto kvalitehta galgá maid buoret šaddat, das maid ieža gohčodit «Finnmárkku deháleamos aktivitehta olgoáibmodoaimmaide ja álbmotdearvvašvuhtii».
Dálveaktivitehtaide ráhkkaneame
Bearralmohkketuvrrat mat lágiduvvojit geassemánus skábmamánnui miehtá fylkka leat váldotuvrrat. Muhto sii lágidit maid dálvetuvrraid. Daid sii leat gohčodan «JULESPREK» ja «Vinterperle».
JULESPREK lágiduvvo adveantaáiggi, mas leat golbma ođđa tuvrra juohke bearjadaga. Dasa leat dán rádjai searvan dát suohkanat:
Hámmárfeasta, Kárášjohka, Fálesnuorri, Mátta-várjjat ja Várggát.
JULESPREK lea čađahuvvon guokte dálvvi.
Vinterperle nammasaš fálaldat lágiduvvo dán dálvvi vuohččan ja lea seamma go geassebearralmohkketuvrrat. Dasa ges leat dán rádjai searvan dát suohkanat: Áltá, Kárášjohka, Guovdageaidnu, Láhppi, Deatnu, Čáhcesuolu ja Várggát.
Bovdejit eambbosiid searvat bargojoavkkuide
Jus galgá lihkostuvvat dáinna doaimmain de dárbbahit eambbo eaktodáhtolaččaid áŋgiruššat. Sii dárbbahit juohke suohkanis joavkku mii pláne ja čađaha bearralmohkketuvrraid. Barggut leat earret eará doalvut kodaárkkaid, tuvragirjjiid ja galbbaid. Jus dát orru miellagiddevaš de gávdná eambbo dieđuid sin neahttasiiddus: www.perletur.no dahje sin facebook-siiddus.