500.000 kruvnna háhkat eanet oahpaheddjiid
Norgga ráđđehus várre 10 miljovnna kruvnna doaimmaide mat oččošedje čeahpes studeanttaid ohcat oahpaheaddjeohppui, 1.-7. luohkái, dieđiha regjeringen.no. Sámi allaskuvla oažžu 500.000 kruvnna iežas guovllus háhkat studeanttaid. Dasa lassin oažžu Uit-norgga árktalaš universitehta 1,8 miljovnna kruvnna seamma ulbmilii.
– Mii dárbbašat ain olu eanet dohkkehuvvon oahpaheddjiid dál ja boahttevaš jagiid. Dál addá ráđđehus oktiibuot gávcci miljovnna kruvnna daid guovlluide gos lea stuorámus dárbu eanet oahpaheddjiide, vai sáhttet beaktilit háhkagoahtit studeanttaid dán dehálaš virgái. Čájehuvvo dása dárbbašuvvo ruhta. Dasa lassin álggahat maid riikkaviidosaš doaimmaid vai oažžut eambbo albmái ohcat vuođđoskuvllaoahpaheaddjeoahppu 1.-7. luohkái, lohká dutkan- ja alit oahppoministtar Iselin Nybø (Gurotbellodat).
Dán jagi lea 15 proseantta eanet studeanttat ohcan dán ohppui eará jagiid ektui. Olgešbellodaga Stuorradiggeáirras, Marianne Haukland, muitala ráđđehus lea ásahan ruđalaš vehkiid studeanttaide, geat váldet vuođđoskuvllaoahppu dahje lektoroahppu, ja sin studieloatna sáhttá mealgat uhccut dan dihtii.
– Lean ilus go Sámi allaskuvlii juolluduvvo ruhta háhkat studeanttaid oahpaheaddjeohppui. Mii dárbbašat eambbo oahpaheaddjiid ovddasguvlui ja lea dehálaš ahte sis lea báikkálaš gullevašvuohta, lohká Ovddádusbellodaga Sámediggeáir- ras Arthur Tørfoss.
– Mii dárbbašat eambbo vuođđoskuvllaoahpaheddjiid vai sáhttit heivehit oahpaheami juohke mánnái, lohká Gurotbellodaga Trine Noodt.
Sii geat válljejit vuođđoskuvlaoahpaheaddji oahppu 1.-7. luohkái, ja čađahit dan vissis áigái ja barget unnimus golbma jagi Davvi-norggas, ožžot eanaš studieloana geahpeduvvot, oktiibuot 161 000 kruvnna.