Oahpahallet fas juoigat
NRK prográmmaráidu «Muitte mu» oidnogoahtá fas TV:S lávvardagaid. Guhtta ođđa artistta leat gergosat oahpahallat juoigat ja buvttadit luođi.
Dušše moadde vahkku maŋŋel go Ella Marie Haetta Isaksen vuittii Stjernekamp gilvvu luđiin, gullogoahtá fas luohti NRK 1:š tv-kanálas.
Skábmamánu 10. beaivvi lea oainnat «Muitte mu» nuppi oasis premieara.
– Luohti lea ožžon olu fuomášumi tv-gehččiin maŋŋel go šattai sierra musihkkašládjan Stjernekamp gilvvus. Sii geat leat návddašan luođi dan olis, besset dál vásihit luođi eará láhkai «Muitte mu» prográmmas, lohká NRK Sámi prošeaktajođiheaddji Wenche Marie Haetta preassadieđáhusas.
Ođđa bálgáráigge
Guhtta norgalaš artistta galget «Muitte mu» prográmmas golmma beaivvis oahppat juoigat ja dasa lassin bidjat luođi soapmásii geas lea stuora mearkkašupmi sin eallimii. Juohke oasseváldis lea juoigi rávvejeaddjin.
Juoiganteknihkka ja jietnageavaheapmi hástala oasseváldiid, muhto sii galget maid fysalaš doaimmaid bokte guorrat bálgá luohtemáilbmái.
– Lea hui gelddolaš oaidnit man láhkai profeššunealla Norgga artisttat, geat eai dieđe olu luođi birra oahpahallet juoigama bokte čilget dovdduid ja historjjáid, lohká Haetta.