Veahkkejoavku ferte jođánit leat olámuttos
Bombaáitaga dihtii šattai politiija evakueret olbmuid Ungdommens Hus nammasaš nuoraidviesus Álttás mannan lávvardaga tiibmu 14.30. Váhnen Anne Marie Haetta muitala su bárdni lei Ungdommens Husas go politiija evakuerii viesu ja sáddii mánáid ja nuoraid ruoktot. Su bárdni lei mielde Álttá sámi giellaguovddáža filbmenbargobajis mii lei doppe seamma áiggi. Vaikko bomba ii bávkkehan, de váillaha váhnen ahte ii lágiduvvon heahtejoavku, dusten dihtii traumáhtalaš dáhpáhusaid.
Vaikke dat bombaáitta ii lean albma, muhto lei dušše muhtin gii háliidii fuomášumi, de aŋkke lea dehálaš ahte dákkár dáhpáhusaid maŋŋel doaibmá veahkkeveahka. Earenoamážit dalle go áitta lea ovddiduvvon dakkár báikái gos leat mánát ja nuorat. Lea njuolggut oalle šluhtuvuohta dušše sáddet mánáid ruoktot. Dán dáhpáhusas dieđus livččii galgan Álttá suohkan dakkaviđe gohččut roassojoavkku čoahkkái vai mánáin ja nuorain livččii vejolaš dakkaviđe hupmat fágaolbmuiguin.
Lea álot dan láhkai ahte issoras vásáhusaid maŋŋel lea buohkain dárbu hupmat dan birra ja oažžut eanemus lági mielde dieđuid. Dat eahpitkeahttá eastada balu cieggamis. Bombaáitagat lea diehttelasat balddihahtti áššit, go terrorafalleheamit leat geavvan dávjá maiddái Eurohpás. Ollu maid lea rievdan suoidnemánu 22. beaivvi, go Norggas čađahuvvui dakkár surgadis terrorfalleheapmi, mii ii leat dáhpáhuvvan maŋŋel nuppi máilmmisoađi. Olbmuin lea juo muđui ballu ahte terrora sáhttá vaikke goas ja gos geavvat. Dákkár áitagiid maŋŋel lea ge dehálaš ahte veahkki lea olámuttos.
Álttá suohkana kulturjođiheaddji Tor Helge Reinsnes Moen lohká Ávvirii, ahte sii árvvoštalle heahteveahkkejoavkku ásahit, muhto gávnnahedje ahte dasa ii lean dárbu. Dat lei dieđus áibbas boasttu árvvoštallan, go oaivvildit dat galgá dáhpin, ahte dákkár terroráitagiid maŋŋel galgá automáhtalaččat leat veahkejoavku olámuttos. Ii ge dan sáhte okta politihkar dahje byrokráhta árvvoštallat ahte lea go dasa dárbu, go dat máhttu han sis ii leat.
Ikte aŋkke dolle diehtojuohkinčoahkkima ovttas politiijaiguin dan ášši birra. Lea hui buorre go dat dahkkui vaikke lea measta beare maŋŋit. Liikká lea dan ášši olis vuogas namuhit sátnevádjasa «buoret maŋŋit go ii goasse ge». Liikká das fertejit buohkat váldit oahpa, ahte diehtojuohkin dákkár áitagiid maŋŋel lea hui dehálaš, ja maiddái dat ahte fágaolbmot leat olámuttos.
Bombaáitagat lea diehttelasat balddihahtti áššit, go terrorafalleheamit leat geavvan dávjá maiddái Eurohpás.