Jotket láhppon olbmo ohcama
Dálki dagaha barggu váttisin ohcanvehkiide, geat leat ohcame albmá gii disdaga gahčai merrii, go lei oaggume mearragáttis.
Disdaga diibmu 13:30 dieđihuvvui muhtin almmái láhppon GáddeIččás. Lei badjelaš 20-jahkásaš olgoriikka bárdni. Son galgá leat gahččan merrii, go stuora bárru bođii go leigga vieljainis bivdime mearragáttis.
Disdaga ohcanakšuvnnas ii lean boađus, ja disdat ija dálki dagahii ahte ohcanveagas ii lean šat doaivva gávdnat albmá heakkas. Gaskavahku muitalii Finnmárkku politiijaguovllu doaibmahoavda Eirik Pedersen ahte sii ohcet albmá gii jáhkkimis lea duššan.
– Dál ii leat šat ohcanakšuvnnas sáhka, muhto mii leat ohcame olbmo gii jáhkkimis lea duššan, lohká operašuvdnahoavda.
Dálki heađušta ohcama
Duorastat iđit ii lohkan Finnmárkku politiijaguovllu doaibmahoavda Eirik Pedersen vel iežaset gávdnan albmá.
– Almmái ii leat vel gávdnon. Eat leat gávdnan eará go diŋggaid maid doaivut leat su, ja dat čájeha ahte olmmoš maid lea dás lahka, lohká Pedersen.
– Lea leamaš heittot dálki mii lea dagahan ahte mii leat rahčan beassat merrii, ja lea dagahan ohcama váddáseabbon. Mii ohcat ain dáid boahttevaš beivviid, fertet oaidnit makkár dálki lea ja man váttis lea ohcat, lasiha son.
Gávdnan albmá jáhka ja oaggunstávrrá
Distateahkeda dieđihedje politiijat Twitteris ahte sii jotket ohcama gaskavahku iđida, go čuvggoda fas. Diibmu ovccis gaskavahku ohcagohte fas albmá. Go Ávvir hupmá Finnmárkku politiijaguovllu doaibmahoavddain Eirik Pederseniin diibmu logis gaskavahku iđida, de lohká dássážii leat albmá jáhkka ja oaggunstávrá gávdnon.
– Mii ohcat nu guhká go lea beaivečuovga, ja sávvat ahte beassat addit oapmahaččaide vástádusa. Mii leat ožžon meroštusaid bieggaháltti, rávnnji ja uli ektui. Ohccojuvvo stuora guovllus, muhto aŋkke seamma guovllus gos almmái gahčai merrii, lohká Pedersen preassadieđáhusas.
Olu návccat biddjon
Ohcamii leat biddjon olu návccat, ja sihke Sea King, guokte SAR gádjunfatnasa, politiijat, ambulánsa ja buokčit serve ohcamii go ohcanakšuvdna álggahuvvui disdaga. Almmái ohccojuvvui gáddeguora, sihke gáttis ja mearas. Maiddái serve buollinčáskadeddjiid buokčit, Rukses Ruossa, politiija, eaktodáhtolaččat ja gádjunfatnasat go geahččaledje gávdnat albmá, gii jáhkkimis lea duššan merrii.
– Gaskavahku mis ledje guokte gádjunfatnasa, Gjert Wilhelmsen ja Odin, dán ohcamis. Mii ohcat olbmo gáddeguora, ja guorrat gáddeguora sihke gáttis ja čázis. Mis ledje maid buollinčáskadeddjiid buokčit veahkkin ohcamis, ja Rukses Ruossa ja eaktodáhtolaččat, lohká Pedersen.
Psykososiálalaš veahkki
Muosáid suohkana ráđđealmmái, Lill Torbjørg Leirbakken, ii lean olámuttos go Ávvir geahččalii oažžut su ságaide. Suohkana sátnejođiheaddji, Reidun Mortensen, lohká suohkana bidjan johtui roassoveahki disdaga juo, váldin dihte vára oapmahaččain maŋŋel surgatlaš lihkohisvuođa.
– Gaskavahku leigga guovttis roassoveahkkejoavkkus mannan dan sullui, geat galggaiga váldit vára oapmahaččain. Leaba dearvvašvuođabargi ja buohccedivššár, ja soai leigga doppe beaivvi, lohká sátnejođiheaddji Reidun Mortensen.
– Deháleamos leat doppe
Sátnejođiheaddji lohká leat dehálažžan ahte doppe leat profeššunealla olbmot oapmahaččaid luhtte.
– Jáhkán dat lea dehálaš ahte doppe leat olbmot oapmahaččaid várás geain lea máhttu dákkár dilálašvuođas, váldit buoremus lági mielde vára olbmuin, geaidda dát guoská eanemusat, lohká son.