Illusáhka Kárášjoga vuođđoskuvlii ja nuoraidbirrasii

Mannan čavčča serve 120 000 oahppi miehtá Norgga našunála geahččalemiide lohkamis, rehkegis ja eaŋgalasgielas gávccát dásis, ja ovccát dásis fas lohkan ja rehket. Udira gaskamearálaš logut čájehit ahte Kárášjoga skuvla lea okta dain skuvllain sámi suohkanin geat birgejedje buot buoremusat sihke lohkamis, rehkegis ja eaŋgalasgielat. Udira logut čájehit ge ahte Kárášjoga skuvla lea ovdánan jagis jahkái, muhto dan ii áigon rektor Jan Gunnar Johansen duođi eambbo kommenteret Ávvirii. Min mielas aŋkke lea dát movttiidahtti ja illu sáhka Kárášjoga vuođđoskuvlii, sihke ohppiide ja oahpaheddjiide, muhto dieđus maiddái olles servodahkii.

Erenoamážit illudahtti go jurddašit ahte maŋemus áiggiid leat gullan oalle ollu heajos ságaid Kárášjoga nuoraid ja nuoraidskuvlla birra. Ovdamearkka dihte ledje duvle stuorra bajilčállagat, ahte Kárášjoga skuvllas leat heajumus vuođđoskuvllapoeaŋŋa bohtosat sámi hálddašan gielddaid gaskkas. Leat maid aiddobeliid gullan dan birra ahte Kárášjoga vuođđoskuvllas lea gievkkan divriluvvan ja muđui nuoski, nu ahte doppe ii sáhte oahpahusa čađahit. Ovdal ge leat leamaš ollu beaggin nárkogeavaheami ja givssideami birra Kárášjoga nuoraid birrasiin, geat leat vuođđoskuvlla agis. Vaikke dat eai leat dál aiddobeliid gullon, de aŋkke leat dakkár ságat mat cegget olbmo muitui. Muđui lea maŋemus áiggiid Kárášjoga gieldda ja servodaga ektui leamaš hui fokus negatiiva beliide, masa dieđus lea ollu sivva go Kárášjoga gielddapolitihkkariin ja hálddahusas lea erenoamáš heajos ekonomiija stivrejupmi.

Dan geahčestagas, de lea hui illudahtti sáhka go Kárášjoga nuoraidskuvlla oahppit birgejit bures eaŋgalasgielas, lohkamis ja matematihkas. Dat dieđus bidjá fokusa ahte Kárášjogas ii leat beare heitot, vaikke dan láhkai sáhttá olmmoš máŋgii smiehtastit. Dan oktavuođas sáhttá ge namuhit, ahte Kárášjogas leat erenoamáš buorit valáštallan vejolašvuođat nuoraide. Das sáhtte namuhit buriid spábbačiekčanšiljuid, čierastanluohká ja vuojadanbasseaŋŋa. Kárášjogas leat ge ollu nuorat geat birgejit bures vuodjamis. Priváhtaolbmot leat maid álggahan hárjehallanstudio mii lea buorre fálaldat nuoraide vaikke dat lea hui ollu ruđa duohken. Maiddái lea veara namuhit ahte Kárášjoga nuoraid gaskkas lea heastabiras erenoamáš stuoris. Sáhttá ge roahkkat dadjat, ahte Kárášjogas lea ollu ja buorit vejolašvuođat nuoraide, muhto álot lea dieđus buoridan munni.

Dat dieđus bidjá fokusa ahte Kárášjogas ii leat beare heitot, vaikke dan láhkai sáhttá olmmoš máŋgii smiehtastit.