Fas ođđa studeantalohkoolahus SÁMI ALLASKUVLII
270 studeantta álge Sámi allaskuvlii dán čavčča. Dat lea justte seammá lohku go diibmá.
Sámi allaskuvlla rektor Gunvor Guttorm lea duhtavaš studeantaloguin.
– Mii leat hirbmat movttegat. Diibmá lei earenoamáš buorre jahki, eatge bálljo duostan jáhkkit ahte fas galggai ná bures mannat. Mis lei mihttu olahit badjel 200 studeantta, dadjá Guttorm preassadieđáhusas.
Duohta studeantalohku lahka 300
Lassin raporterejuvvon studeantalohkui bohtet vel studeanttat geat čađahit sierraheivehuvvon oahpu ruoŧabeale man Ruoŧa Skolverket lea ruhtadan. Nu lea duohta studeantalohku lahka 300.
Jahkásaččat gerget sullii 200 oahppi norgga joatkkaskuvllain geain lea sámegiella juogo vuosttašgiellan dehe nubbingiellan.
– Dát buktá veháš perspektiivva man stuora oassi boahtá Sámi allaskuvlii, lohká Gunvor Guttorm.
– Lihkolaš go bessen ohppui
– Dovddan hui lihkolažžan go bessen dán ohppui, dadjá studeanta Kare Elle A. Eira.
Kare Elle A. Eira lohká geabbilis praktihkalaš pedagogalaš oahpus (GPPO), seammás go bargá pedagogalaš jođiheaddjin Guovdageainnu suohkana mánáidgárddis. Sámi allaskuvllas leat olu neahttavuđot, gáiddusoahpahus dehe nu gohčoduvvon geabbilis oahpahusat mii lea stuora oassi manne olu studeanttat Sámis válljejit boahtit Sámi allaskuvlii. Kare Elle lea okta sis.
– Oahppu orui mu mielas nama mielde jo hui gelddolaš, dadjá Kare Elle A. Eira. – Oahpaheaddji guovttos leaba hui čehpet huksen ja heivehan oahpu stuđeanttaide, lohká son preassadieđáhusas.
Son ozai dan dihte go lea vejolaš lohkat fága, seammás go olles virggis bargá. Birrasii 30 studeantta leat álgán ohppui. Kare Elle oaidná ahte dáinna oahpuin oažžu eambbo vejolašvuođaid eará bargguide ohcat.
Máhttoháhkan
Studeanttat ieža čađahit máhttoháhkama earret eará digitálalogaldallamiid bokte ruovttus, go sidjiide heive. Deaivvademiin de barget bargobihtáiguin, joavkobargguiguin ja ovdanbuktiimiiguin mat leat čadnon digitálalogaldallamiidda. Dát mearkkaša ahte GPPO:AS jorgaluvvo máhttoháhkan nuppe ládje go dat mii lea dábálaš árbevirolaš skuvllas, gos oahpaheamis leat logaldallamat luohkkálanjas ja studeantabarggut fas leat ruovttus.