Girječállis stuorra beroštupmi sámiide
Lea Máhte-dánela Odd Máhte Susanne, Susanne Haetta gii lea govvidan Synnøve Persena girjji bokte, man namma lea «Luondduadjágasat – Dreamescapes». Girji lea čállon davvi sámegillii, dárogillii, eŋgelasgillii ja duiskkagillii.
40 jagi suokkardan
Dáiddár Synnøve Persen lea juo 40 jagi iskkadan ja guorahallan ivnniid giela ja poesiija musihka. Girjjistis «Luondduadjágasat
– Dreamscapes» muitala Haetta, Synnøve Persena ivnniid, eallima áigodagaid, reflekšuvnnaid, priváhta eallima ja málago- vaid ja divttaid šaddama birra.
Girjjis muitala Persen, girječálli čállaga bokte iežas ivnniid, eallindásiid, priváhtaeallimis ja iežas tevnnegiid ja divttaid hábmema birra.
Govat girjjis čájehit dáiddára eallima, sihke dokumentáralaš ja dáiddalaš vugiin. Muhtun govat leat ođđa dulkomat Persena buktagiin árktalaš ja urbána eanadagas.
Persena reflekšuvnnat iežas dáidaga ja orgánisašuvndaolbmo birra, addet lohkkiide ođđa perspektiivva sámi dáidagis.
Dovddus dáiddára govvidan
Govvadáiddár ja poehta Synnøve Persen lea Beavgohpis Porsáŋggus eret ja son lea okta dain dáiddáriin sihke sámis ja internášunálalaččat gii lea eanemus dovddus.
Son lei mielde Sámi dáiddajoavkkus Mázes 1978-83 ja lea čiŋahan ja herven olu almmolaš visttiid ja lea leamašan mielde olu čájáhusain, earret eará Documenta 2017:s. Persen lea almmuhan olu girjjiid sámegillii, ja mat leat jorgaluvvon eará gielaide.
Guokte su girjjiin leat evttohuvvon Davviriikkaid Ráđi girjjálašvuođa bálkkašupmái. Su ođđaseamos diktačoakkáldat lea «Ruoná rieggá vuol váccašit – Under grønn ring vandre» (2017).
Dáiddalaš ovttasbargu
Girji mii dál almmuhuvvo, sáhttá gohčodit dáiddalaš ovttasbargun guovtti dáiddára gaskkas. Go girječálli Susanne Haetta lea maiddái govvejeaddji ja dáiddár.
Son lea ovdal almmuhan earret eará girjji «Mari Moments – Mari Liibbat», mii lea girji Mari Boine birra. Dáiddárin son lea oasálastán máŋgga čájáhusain, earret eará OCA čájáhusas «Let the river flow» Olsos 2018:s.
Synnøve Persen, gii lea earret eará ožžon Kulturráđi 2018 gudnebálkkašumi ja nammaduvvon Bassi Olav ortnega kommandevran mannan čavčča, lea dál govviduvvon ođđa dáiddagirjjis. Odne almmuhuvvo girji ja ihttá rájes soai álgiba johttit girjeovdanbuktimiin.
Ollu hástalusat go govvidit galgá olbmo
Girječálli Haetta muitala ahte leat ollu bealit maid ferte jurddašit ja vuhtiiváldit go galgá ovtta olbmo birra čállit ja su govvidit ná vuđolaččat.
- Vuos ferte dovddiidit ja oažžut luohttámuša olbmos gean birra čállá. Bargu šaddá dahkkot vuđoleappo ja olles proseassa lea áddjás bargu. Ovttaoaivilvuohta ja ahte olmmoš gean galgá govvidit maiddái váikkuha ja veahkeha, lea hirbmat dehálaš, lohká Haetta.
Son muitala maid ahte sus lea stuorra beroštupmi sámiide ja sámi fáttáide. Dan dihtii lea ge válljen dovddus sámi dáiddára birra čállit.