Ii okta ge leat homo nuppi divišuvnnas
Dán rádjái ii leat vel okta ge rahpasit muitalan ahte lea botnjut spábbačiekčanbirrasis. Dát lea okta fáttáin Romssa árktalaš girjáivuohtafestiválas.
Bihttá lea nuoraide ja lokte fáttá movt lea homofiilan leat – dahje botnjut – spábbačiekčamis, čállá Romssa árktalaš girjáivuohtafestivála preassadieđáhusas.
«Ii okta ge»
Teáhterjoavku lea jo čájehan bihtá Nationála Scenes Bergenis, go Norgga spábbačiekčanlihttu (NFF) lei oastán guokte čájálmasa bihtás. Váldokarakteara lea Kristian Andersen, gii lea spábbačiekčandoarju.
Son lea logaldallanmátkkis ja hupmá dan birra movt lea homofiilan leat spábbačiekčanbirrasis ja manne lea nu váttis ovddidit iežas homofiilan jus lea spábbačiekči. Son lea ieš homo ja berošta hirbmosit iežas čiekčanjoavkkus ja spábbačiekčamis.
Kristian lohká alddis olbmá geainna lea interneahtas oahpásmuvvan, muhto son ii dovdda su. Kristian gohčoda su «ii okta ge». Dat «ii okta ge» čiekčá nuppi divišuvnnas, muhto gii jur son lea? Čájálmasas boahtá «ii okta ge» lagabui.
Son lea ovdamearkan ahte gávdno juobe okta homofiila čiekči Norggas: ii okta ge.
Nuvttá čájálmas Alfheim Stadionas
Lea viđat jahki go Romssa árktalaš girjáivuohtafestivála lágiduvvo. Dál lea teáhterčájálmas mielde mas lea homofiliija birra spábbačiekčamis.
Fáddá lea áigeguovdil, ja dán rádjái ii leat vel okta ge rahpasit muitalan ahte lea botnjut spábbačiekčanbirrasis. Romssa Valáštallanráđđi, Romssa Spábbačiekčanbiire ja Romssa Valáštallanbiire mihte ovttasbargui čájehit dan dehálaš teáhterbihtá festiválas Romssas. Leat ollu nuorra valáštallit geat besset oaidnit dán čájálmasa skábma- mánu 2. beaivvi Alfheim Stadionas. Čájálmas lea nuvttá buohkaide geat áigot oaidnit dan.
Buoridit guottuid
– Lea hui dehálaš leat searválaga valáštallamiin ja ahte beassat čájehit dan čájálmasa. Dat dahká positiivvalaččat buori guottuid ektui dain bargguin mas máŋggabealatvuohta, gierdevašvuohta ja olmmošvuohta lea váldooassin, lohká festiválahoavda Stein Sebastian Fredriksen. Girjáivuohtafestivála álgá mánnodaga, ja dan oktavuođas čájehuvvo teáhterbihttá.