«Eallin» dánsunčájálmas čájehuvvo vuosttaš geardde
«Eallin» dánsunčájálmas čájehuvvo vuosttaš geardde Dansefestival Barents Hámmárfeasttas dán vahku ja heive bures festivála fáddái, mii lea sámevuohta.
Skábmamánu čihččet beaivvi čájehuvvo vuosttaš geardde ihkinassii dánsunčájálmas «Eallin» mii bistá 45 minuhta Arktisk kultursenteris. Čájálmasas dánsuba omasvuotnalaš Camilla Therese Karlsen ja dánskalaš Zietra Møller ođđa áigásaš dánssaid, Emil Karlsen ođđa musihka mielde. Camilla Karlsen lea ráhkadan su máttaráddjá Efraim Pedersen máidnasiid vuođul dánsunčájálmasa ja muitalusa maid son muitala dárogillii čájálmasas. Su neahpi Emil Karlsen ges muitala dan sámegillii.
– Lea hirbmat somá boahtit ruoktot Norgii ja čájehit vuosttaš geardde dánsunčájálmasa mainna lean bargan Berlinas Tuiskkas. Dát bargu lea bistán máŋga buolvva, muhto ánssáša muitaluvvot earáide, lohká Camilla Therese Karlsen.
Son muitala son diibmá Lásságámmes oaččui dan ráfi maid dárbbašii hábmet dánsunčájálmasa. Doppe lei maid su neahpi Emil Karlseniin gii ráhkadii njeallje musihkabihttá dása ja velá luođi.
– Lean hirbmat rámis go fuomášin dán dánsunčájálmasa mannan dálvvi hárjehallamiin ja háliidin dán fárrui dálá festiválii, lohká festiválahoavda Siri Wigdel.
Máttarádjá máidnasat
Camilla Therese Karlsen muitala su máttaráddjá Efraim Pedersen muitalii dáid máidnasiid gielladutkái Just Quigstadii. Efraim Pedersen ásai Oterodden báikkis Omasvuonas.
– Eadni jámii 2014, muhto ovdalgo jámii, de geigii munnje dáid máidnasiid mat leat oassin Just Quigstad álmmokeahtes čállosiin. Eadni, Elna Karlsen, lei okta daid vuosttaš olbmuin Omasvuonas gii duosttai coggat gávtti badjelassii, muitala Camilla Therese Karlsen.
Olahan mihttomeari
Camilla Therese Karlsen lea 41 jagi boaris, eret Omasvuonas ja lea sihke dánsejeaddji ja akrobáhtta. Dán bihtás oažžu velá dánsunveahki Zietra Mølleris.
– Mu mielas lea máttarádjá muitalusat vuoiggalačča ja njuolggočoalat. Son muitala jápmima birra, muhto maid eallima birra go jápmin lea oassi eallimis, lohká Camilla Therese Karlsen.
Čilge «Eallin» dánsunčájálmas mearkkaša sutnje ahte lea olahan mihttomeari mii lei ráhkadit dánsunčájálmasa. Muitala lea su vuosttaš dramáhtalaš dánsunčájálmas ja dát čájálmas galgá boahtte jagi čájehuvvot Dramatikkens Hus viesus.
Sámegillii ja dárogillii
Dánsunčájálmasas muitaluvvo dáro- ja sámegillii. Emil Karlsen muitala dan sámegillii. Emil Karl- sen gii lea vokalista Resirkulert musihkkajoavkkus, lohká šaddat oalle hástalussan muitalit dan sámegillii, muhto doaivu manná bures.
– Áhkku láve máttarmáttarádjá Efraim Pedersena máidnasiid muitalit munnje mánnán. Mánnán ledje dát máidnasat veahá issorasa, erenoamážit go áhkku lei nu čeahppi daid muitalit. Lásságámmis lei nu buorre dovdu ja sáhtten komponeret musihka. Dán dánsunčájálmassii lean ráhkadan njeallje bihttá ja lassin velá ádjá luođi. Gulastin Bergen studentradio lei addán dán luohtái buorre árvosáni, moddjá Emil.