Stáhtaadvokáhtta GÁIBIDAN DUTKAT bilkidii go sápmelaččaid
Stádaadvokáhtta gáibida politiijaid iskat lei go dán áššis sáhka etnalaš bilkideamis.
Ávvir čálii golggotmánu 18. beaivvi go politiijat hilgo Hans Petersena váidaga Tore Løvik vuostá. Dál leat stádaadvokáhtat geahččan ášši, ja hilgun ii dattetge dohkkehuvvo.
– Dát lea vuoitu mii čujuha rievttes guvlui. Mun lean navdán ahte politiijat leat dahkan unnán dán áššis, ja dat čájeha ahte mu navdin doallá deaivása, ja maiddái čájeha dát ahte cielaheapmi sápmelaččaid vuostá ii soaitte váldot nu duođalažžan muhtin báikkiin riikkas, lohká Hans Petersen ieš dan birra.
– Beare duođalaš ášši
Maŋŋel go Kristiandsund Atletklubba jođiheaddji, Tore Løvik, lei gárvodan kloavdnan ja sápmelažžan miessemánu 17. beaivvi ráidui, lei Hans Petersen dolkan nállevealaheapmái ja fallehemiide ja válljii váidit ášši.
Politiijat hilgo Petersen váidaga, muhto lea vejolaš sáddet moaitaga váiddahilguma dihte guovllu stádaadvokáhttii.
Petersen dagai dan, ja lea buoremielas go oaivvilda stádaadvokáhtta oinnii duođalašvuođa áššis vaikko politiijat eai dahkan dan.
– Duođalašvuođagráda áššis lei ággan dasa ahte váiddahilgun ii dohkkehuvvon, lohká Hans Petersen.
– Oaivil oažžut fuomášumi
Reivves, man stádaadvokáhtta Kjell-otto Lilleberg čállá, boahtá ovdan ahte váiddahilgun ii dohkkehuvvo.
Lilleberg čállá ahte ášši guoská vealaheaddji dahje vašánis ovdanbuktimiidda, man ráŋggáštuslága §185 fátmmasta.
– Konkrehta jearaldat lea, lea go várohuvvon olmmoš go geavahii gávtti Kristiandsunda boargárráiddus miessemánu 17. beaivvi 2018, biktasiid ja láhttemiid bokte, bilkidan dahje dahje badjelgeahččan eará olbmuid sin etnalaš (sámi) duogáža dihte. Dat dáhpáhuvai almmolašvuođas. Dat dáhpáhuvai dakkár oktavuođas (boargárráiddus, álbmotbeaivvi) mas lea juste dat oaivil ahte oažžut fuomášumi, čuožžu reivves.
Várohuvvon olmmoš ferte gažaduvvot
Reivves čállá maid stáhtaadvokáhtta ahte politiijat eai leat gažadan Tore Løvika, muhto Løvik lea almmolaččat ovdanbuktán oaiviliid mat duođaštit su láhttema. Gávdnojit maid govat mat duođaštit su láhttema.
– Eat mii bilkit, muhto suohtastallat
Lilleberg čállá ahte ráŋggáštanláhka § 185, fátmmasta iešdáhtolaš dahje roavva váruhisvuođa (uaktsom) rihkkumiid, mii mearkkaša ahte várohuvvon almmái almmatge ferte láhtten láitinládje, ja nu lea vuođđu ainjuo garra moaitámuššii.
– Duođaštusaid, sivalašvuođagáibádusa ja mearrádusaid vuhtii váldima vuođul, lea stádaadvokáhtta mearridan ahte ášši ii sáhte hilgojuvvot ovdal go várohuvvon almmái lea čilgen bealis. Čilgehus ferte čielgasit čujuhit várohuvvon albmá subjektiivvalaš beliide, čuožžu reivves.
Nu lea stáhtaadvokáhtta mearridan ahte ášši ii leat heaittihuvvon. Dákkár áššiin sáhttá sáhkkohallat dahje giddagassii gártat gitta golmma jahkái.
– Ii leat eará kommentára
Møre ja Romsdal politiijaguovllu áššáiskuhttingeatnegas Susanne Molund ii loga ášši birra olus eambbo go ahte várohuvvon almmái galgá gažaduvvot.
– Mus ii leat eará kommentára go ahte áššáskuhttineiseváldi váldá stáhtaadvokáhta rievdadusa vuhtii, vai várohuvvon olmmoš gažaduvvo, ja das maŋŋel árvvoštallo áššáskuhttin fas ođđasit, lohká Molund.
Sávvá ahte ráŋggáštuvvo
Hans Petersena mielas ii leat dá dohkálaš láhttenvuohki, ja sávvá ahte Tore Løvik dan geažil šaddá ráŋggáštuvvot juoga láhkai.
– Sávan ahte Møre ja Romsdal politiijaguovlu gávnnaha ahte dát lea rihkolaš dahku ráŋggástanlága §185 vuođul. Sávan maiddái ahte Tore Løvik, dan dihte go galgá leat mánáide ovdagovvan, ja dan dihte go dát geavai miesse-