Bálkkát njidje presideanttas ja ráđđelahtuin diibmá
Sámediggeráđđelahtuin ii lean seamma alla bálká diibmá go jagi ovdal. Henrik Olsen lohká diehtit manne nu lea.
Diibmá molsašuvvojedje vihtta ráđđelahtu Sámedikkis maŋŋel válgga, ja Aili Keskitalo beasai fas čohkkedit presideantastullui.
Maŋŋel molsašemiid, go Keskitalo šattai guođđit presideantasaji ovdal juovllaid 2016:s, de njiejai sus ollislaš bálká. Nu dagai maid sámediggeráđđelahtuin muđuid. Golggotmánus, diibmá, beasai Aili Keskitalo fas čohkkedit presideantastullui.
Dán háve ledje sus sámediggeráđis Henrik Olsen, Silje Karine Muotka, Mikkel Eskil Mikkelsen ja Berit Marie P.E. Eira.
Ollu rievdadusat
– Diimmá ráđi molsašumi dihte njidje bálkkát nu ollu, lohká Henrik Olsen, gii ii loga oaidnán vuos daid loguid.
Sámediggeráđđi Henrik Olsen lea ruovttus Gáivuonas go Ávvir riŋge sutnje.
2016:s lei Olsenis birrasii čuođi duháha eanet dienas go 2017:s.
– 2017:s eat lean ráđis, ja mis leat leamaš eará barggut dan áiggis ovdal go besse fas ráđđái. Lei veahá bálká báhcán maŋŋel go leimmet Sámediggeráđis geargan, ja maiddái lea okta mánnu go ii leat luopmoruhta mii mákso politihkkáriidda, dadjá son.
Vuohččan ráđi dienaslisttus
Sámediggeráđis leaba Mikkel Eskil Mikkelsen ja Berit Marie P. E. Eira vuohččan mielde Sámediggeráđi dienaslisttus.
– Dat lea dieđusge dakkár ahte mii leat almmolaš olbmot ja lea badjin bálká. Mii diehtit ieža ahte logut bohtet álbmosii go leat almmolaš doaimmas, lohká sámediggeráđđi Berit Marie P.E. Eira, gii lea jagi doaibman ráđis. Sudno ráđđebálkkát eai vuhtto ovdal 2018 go vearrologuin.
Aili Keskitalo dienas njiejai 904 612 ruvnnos 2016:s gitta 639 037 ruvdnui 2017:s. Dat lea badjelaš