Norgga-ruoŧa boazodoallokonvenšuvdna ferte čielggaduvvot
Lea dohkketmeahttun ahte ii leat leamaš šiehtadus ođđa boazodoallokonvenšuvnna birra 2005 rájes. Mii dárbbašat čovdosiid áššiide mat gusket rádjarasttildeaddji boazodollui, ja danne ferte boazodoallokonvenšuvnna bargu gaskal Ruoŧa ja Norgga ovdánit dál.
Jearahallamiid maŋŋá dikki oktavuođas Sáččá diggegottis háliidan deattuhit ahte lea guovtti riikka stáhtalaš politihkka jahkečuđiid čađa, ja mii ii leat doaibman, mii lea vuođđun moalkás vuoigatvuođariiddus rádjarasttildeaddji boazodoalus. Mii oaidnit dan ovdamearkka dihte diggeáššis gos Sárevuomi čearru lea mannan diggái norgga stáhta vuostá. Riidu lea guohtunvuoigatvuođaid birra norgga bealde guovllus man maiddá norgga bealde boazosápmelaččat geavahit.
Boazosápmelaččain geain árbevirolaččat leat leamaš guohtun- eatnamat goappašiid bealde riikkarájáid lea rádjebidjama maŋŋá ja eará stáhtalaš mearrádusaid mielde hilgojuvvon geavahit guohtuneatnamiid norgga bealde. Dat boazosápmelaččat geat dál geavahit daid seamma guohtuneatnamiid leat dahkan dan máŋggaid buolvvaid, maŋŋá go sii buriin doaivvuin sirde iežaset boazodoalu dán guvlui gulahallamiin norgga eiseválddiiguin. Dán dilálašvuođas leat sámi beroštumit vuostálagaid ja gáibidit vuoigatvuođaid seamma guovlluide. Dát riiddut gáibidit ollu olmmošlaš ja ruđalaš návccaid sis geat geahččalit birget iežaset ealáhusbargguin.
Go eai leat šiehtadusat mo dáid guohtuneatnamiid galgá geavahit, šaddet áššit dávjjit čielggaduvvot rievttálaččat. Sápmelaččat dáistalit riektevuogádagas beassat geavahit guohtuneatnamiid, ja guohtuneatnamiid seailluheapmi lea dáistaleapmi go guovllut áitojuvvojit eanet ahte eanet, go álelassii leat ođđa sisabahkkemat nu mo bieggamillut, bartaguovllut ja skohterjohtolat.
Oktanaga leat šiehtadallamat boazodoallokonvenšuvnna dáfus oalát bisánan stáhtaid gaskkas. Lea dattetge hoahppu sihkkarastit ođđa boazodoallokonvenšuvnna, ja Sámedikkiid bealis leat mii buktán evttohusa konvenšuvdnii mii sáhtášii leat vuođđun čoavdit riidduid, mat dál eai ovdán. Stáhtat, geain lea ovddasvástádus dasa ahte dilli lea darvánan, fertejit fuolahit ahte konvenšuvdnabargu hoahpuhuvvo.
Mii eat sáhte diktit politihka eahpelihkostuvvat dákkár áššis.