– Galggašii gieldit VUOVDIMIS ealli bohccuid
Tromsø Lapland turistafitnodaga eaiggát Per Stian Sara atná unohassan go Sámis leat vuovdán ealli bohccuid olgoriikii čájáhusaid váste. Sii leat máŋgii hilgon dakkár jearaldaga.
– Dat ii leat gal vuogas, biinnidit bohccuid go atnet daid viesuid siste. Oidnojit leat ruoidnasat ja leat njalgan maid visot. Ii galggaše vuovdit bohccuid olgoriikalaččaide ja dáččaide. Ii dain leat dat máhttu ja ipmárdus bohcco dárbbuide. Diekkáriid galggašii bissehit, dadjá Per Stian Sara.
Son muitala ahte su fitnodat lea máŋgii ožžon jearaldaga vuvdet go ealli bohccuid, muhto son ii loga árvvoštallan ge dakkár gažaldagaid.
Duhtavaš garra lágaiguin
Per Stian Sara jođiha Tromsø Lapland fitnodaga mas fállá earret eará heargevuodjima turisttaide. Sis leat birrasii 50 ja 70 bohcco ain hávális turistabáikkis, hearggit ja heargeávdnasat. Sin turistaáigodat lea birrasii guhtta mánu jagis. Muhto son lohká sis lea viiddis sadji ja leat áidon máŋga lanja bohccuide turistenbáikkis mii lea Guohcavuomis Romssa lahka. Son lea duhtavaš go lea nu garra geahčču elliidsuodjaleami dáfus Norggas.
– Norggas gal leat lihkus nu garra lágat mat sihkkarastet ahte bohccuin lea buorre dilli, sihke saji ja biebmama dáfus. Dán áigge han lea vel nu ahte eai čuovo dušše min geat biebmat bohccuid, muhto mannet maid iskat siiddain ja orohagain, ja dat orru buorre, dadjá Sara.
Govven čiegus kamerain
Juovllaid ovddabealde leat ge ealli bohccot hui bivnnuhat juovlačájáhusain ja iešguđet lágidemiin olgoriikkas. Muhto dál leat leavvan govat ja video maid brihttalaš elliidsuodjalanorganisašuvdna Animal Aid suoli lea govven golmma iešguđet boazofárpmas Stuorabrittánias. Dain govain oidno ahte bohccot ellet surgadis dilis.
Dat biidnahuvvet gáržadasas viesuid siste. Leat guoirasat, guolga njalgan feara gokko ja videoin oidnojit bargit maid čiekčame ja huškume vašiin bohccuid.
570 bohcco Sámis
Animal Aid dieđuid mielde bohtet olu bohccot Ruoŧas, Norggas ja Suomas, go jagiin 2014 ja 2017 gaskkas galget 570 bohcco oston Sámis dohko.
Dás lea ráhkaduvvon vuosttaldanakšuvdna neahtas. Animal Aid bivdá dál olbmuid boikohttet, ii ge fitnat doaluin gos čájehit ealli bohccuid. Ruoŧa stuorámus elliidsuodjalan-organisašuvdna Djurens Rätt diehtojuohkki Moa Richter Hagert muitala ahte sii leat maid álggahan diehtojuohkima dán ášši birra.
– Min mielas lea hui boastut go váldet elliid mat lunddolaččat gullet lundui, ja bidjet guoimmuheami dihte steaŋgasii. Bohccuid ii heive doallat giddagasas, go dat leat hárjánan viiddis guovlluide ja beassat guohtut jeahkála friddja dilis, dadjá Hagert Ávvirii.