NRK Finnmárkku ođđa redaktevra
NRK lea dál virgádan Robin Mortensena ođđa guovlluredaktevran NRK Finnmárkui, čállá NRK.
NRK Finnmárkkus lea ovddasvástádus gokčat ođđasiid Finnmárkkus buot dásiin, ja lea oassin NRK davvi guovllus mas leat golbma guovllukantuvrra ja okta riikkaossodat.
Robin Mortensenas (40) lea viiddis journalisttalaš duogáš Finnmark Dagbladas, Altapostenis ja NRK:S. Son lea suoidnemánu rájes leamaš konstituerejuvvon guovlluredaktevran NRK Finnmárkkus, maŋŋil go Morten Ruud duššái girdilihkohisvuođas mannan geasi.
Maŋemus jagi ovdal dan, lei son redakšuvdnahoavda seamma sajis. Son álggii NRK Finnmárkui 2013:s ja lea leamaš rádio prográmmajođiheaddji reporttar rádios ja TV:S, ja váktahoavda ođasredakšuvnnas ovdal go šattai redakšuvdnahoavdan. Lassin lea Mortensen bargan ollu hukset NRK:S neahtta ja sosiálamediaid fálaldaga Finnmárkkus.
Mortensen lea máŋga jagi leamaš luohttámušdoaimmain Norsk journalistalágas ja NRK Journalistalágas.
Regiovdnahoavda Tone Kunst lohká earret eará ahte lea hirbmat duhtavaš go leat ožžon čeahpes, stáđás ja doaimmalaš jođiheaddji. Ieš Robin Mortensen ges lohká earret eará lei suohtas go oaččui virggi ja ahte sutnje dagahii álkibun mearrádusa váldit danne go Morten Ruud lei dat gii su rekruterii jođiheaddjejovkui. Son illuda álgit bargat gelddolaš plánaiguin ja áigumušaiguin, mat leat ahte fylkka áššiid oažžut regionála ja našunála áššelistui.