– MIS LEAT IEŽAMET kvalitehtasihkkarastimat jorgalanbargguin
Davvi Girji AS mii vuovdá jorgalanbálvalusaid Oahppodirektoráhtii, ii áiggo kommenteret áššái mas našunálageahččalemiid jorgalanbargu moitojuvvo.
Maŋemus vahkuid lea Ávvir čállán našunála geahččalemiid birra, mas bođii ovdan man hejot Guovdageainnu suohkana skuvllat lihkostuvvet rehkegis gávccát dásis. Dasa vástidii earret eará Guovdageainnu nuoraidskuvlla rektor, Ellen J. Sara Eira ahte sáhttá giella leat sivvan.
Maiddái Ole Einar Haettai, gii oahpaha rehkega sihke Guovdageainnu nuoraidskuvllas ja Sámi allaskuvllas, ii lean ge amas ahte rehkega geahččaleami jorgaleapmi lea heittot. Son buvttii máŋga ovdamearkka mat su mielas ledje jorgaluvvon endorii. Haetta logai maid ahte orru jorgaluvvon sánis sátnái dárogielas sámegillii ja lassin vel orru váilume rehketgelbbolašvuohta jorgaleaddjis. Okta ovdamearka lei ná: – Min gillii lea juo darvánan ahte beali stuorát lea duppalit, duppalasttimis sáhka. Go dat lea dárogillii «halvparten så stor», de lea unnidan. Go min oahppit lohket sámegillii, de lea duppalastojuvvon, ja govva maid oidnet lea unnideamis sáhka. Dat han addá juo áibbas boasttu gova, go govva ja teaksta ii leat seamma. Jus oahppi lohká nu, de han dat šaddá boastut, vástidit boastut go šaddet árvádallat, čilgii Haetta.
Davvi Girji AS ii áiggo kommenteret ášši
Oahppodirektoráhta muitalii ges ahte čuoččuhus moaitagiid birra lea amas sidjiide. Ja ahte lea sámi lágádus mii jorgalanbarggu bargá sin ovddas.
Oahppodirektoráhta oastá jorgalanbálvalusaid Davvi Girji AS:S. Lágádushoavda, Jan Helge Soleng ii áiggo kommenteret maide dasa go Ávvir jearrá kommentára ovdamearkkaide maid Ole Einar Haetta lea addán našunála- geahččalemiin ja makkár kvalitehtasihkkarastin sis lea jorgalanbargguin:
– Sáhtán obbalaččat vástidit ahte mis leat iežamet rutiinnat movt kvalitehtasihkarastin dahkko jorgalanbargguin, muđui in kommentere dán ášši. Sáhtán maid lohkat ahte mii leat leamaš oktavuođas Oahppodirektoráhtain ja čujuhan muđui buot eará jearaldagaid sidjiide.
Sámedikkis beroštupmi čuovvulit ášši
Sámedikki vuođđooahpahusa fágajođiheaddji, Brita Oskal Eira, bajásšaddan- ja oahpahu- sossodaga hálddahusas čájeha be roštumi čuovvulit dahje kommenteret ášši. Muhto lohká ahte fertešii politihkalašdásis oažžut kommentára.
Ávvir ii ožžon ságaide Sámediggeráđđelahttu Mikkel Eskil Mikkelsena, guđes lea ovddasvástádus bajásšaddan-, oahppu- ja dutkan áššiin, ovdal go ášši deaddeluvvui.