Oahpahit mánáide psyhkalaš dearvvašvuođa birra
NRK Supera jahkásaš fáddábeaivvit váldet dán jagi ovdan mánáid psyhkalaš dearvvašvuođa fáddábeivviin, mat leat skábmamánu 12. – 14. beaivvi.
– Mánát ohppet ollu movt váldit vára rupmašis ja fysalaš dearvvašvuođas, muhto maid sii dihtet psyhkalašdearvvašvuođa birra? Go eanet ja eanet mánát muitalit ahte sii rahčet psyhkalaččat, de áigu NRK Super bidjat fokusa mánáid psyhkalašdearvvašvuhtii, muitala prošeaktajođiheaddji Beate Rendahl NRK:I.
Lea njealját geardde go NRK Super lágida fáddábeivviid. Diibmá lei fáddán seksuála illasteamit, ovddit jagiid ges ledje fáttát earráneapmi ja gárrendilli.
Filmmat ja neahttaáššit
Fáddábeivviide ráhkaduvvojit guokte smávva drámaráiddu. Vuosttaš ráiddus leat duohta historjját nuorra rávesolbmuid birra geat rahče mánnán psyhkalaččat, earret eará lossa jurdagiiguin ja baluin. Nuppi ráiddu lea Erlend Loe čállán, ja dat galgá mánáide oahpahit dovdduid birra.
Filmmat čájehuvvojit NRK Superis ja biddjojuvvojit nrksuper.no neahttasiidui.
Fáddá galgá bures čalmmustahttojuvvot sihke TV:S, rádios, nettspillerenis, sosiála mediain ja NRK Supera appas «Svar-ometer».
Sávvet skuvllaid oažžut fárrui
Diehtu fáddábeivviid birra lea sáddejuvvon buot norgga skuvllaide.
– Mii áigut oahpahit mánáid identifiseret ja ipmirdit dovdduideaset ja makkár dárbbuid dovddut čájehit. Sii fertejit oahppat ahte lea ortnegis čájehit dovdduid, ja ahte fertejit ohcat veahki jus rahčet. Go mánáid psyhkalaš healsu lea rávesolbmuid ovddasvástádus maiddái, de sávvat mii ahte oahpaheaddjit, mánáidgárdebargit, dearvvašvuođadivššárat, váhnemat ja eará rávesolbmot bidjet fokusa dán fáddái dáid beivviid, lohka Rendahl.
Ovttasbargi Rukses Ruossain
NRK Super lea šiehttan ovttasbarggu Rukses Ruossain muhtun osiide fáddábeivviin. Rukses Ruossa lea filmmaid vuođul hutkan oahpahusa heivehuvvon 5.-7. luohkáide, mii maiddái sáddejuvvo buot skuvllaide norggas.
NRK čállá vel ahte jus oktage mánná dárbbaša dorvvolaš rávesolbmuin hupmat, de lea sis ságastallanbálvalus «Kors på halsen» masá mánát sáhttet riŋget, oažžu leat anonyma ja lea nuvttá. Sis lea neahttasiidu gos sáhtte čállit rávesolbmuin: korspåhalsen. no ja telefuvdnanummár lea 800 333 21.