Nilut Cupa «jiehtanas» rábastii visot mielde maid juo sáhtii
Áiggiid čađá maŋemus Nilut Cupa čiekčamiin lei «jiehtanas» mii rábastii visot mielde mii juo lei oažžumis doppe.
Jurra ja čearggas lea leamaš Báktehárjjis Guovdageainnus olles vahkkoloahpa. Lei áiggiid čađa maŋemus Nilut Cup mii lágiduvvui. Nu go lea ge gilvvus, de ledje dušše vuoitit geat vel čužžo maŋemus šilju alde ja illudedje.
Vuot ledje dat Romssa nissonjoavku PSG, ja Álttá joavku Johansens Utvalgte, nu go diibmá.
Joavkkut, dievdduid finálas, ledje hui dássálaga, muhto liikká ledje Johansens Utvalgte dego buorebut. Njunnošis sis vel áltálaš Svein Ove Thomassen, gii maid bážii eanemus moalaid dán jagi. Oktiibuot 22 moala.
Son lei ge gii coggalii dan ovtta moala čiekčamis, ja maid dainna coggalii maŋemus moala Nilut Cupa historjjás.
Doalvvui visot
Johansens Utvalgte sáhttá lohkat lei dat buoremus joavku obbalaččat. Sii nahkehedje eanemus moalaid čiekčamiin, ja nu go namuhuvvon ovdalis, de lei sis dat buoremus moallabáhčči.
Thomassen vuittii visot mii lei vuoitit dievdduid bealde. Son lei skuhttáreamos moala ovddabeale, go coggalii 22 moala. Son válljejuvvui Nilut Cupa buoremus čiekčin, son oaččui mielde Nilut Cupa vuoitopokála, ja dasa lassin vuittii vel su joavku Nilut Cupa johttipokála. Jus johttipokála galgá oažžut, de galgá golmma geardde vuoitit Nilut Cupa. Johansens Utvalgte vuite dál nuppes, ja Team Nilut lei maid guktii vuoitán. Nu go lei maŋemus Nilut Cupa, de sii vuorbádedje vel pokála dan guovtti joavkku gaskkas, ja Thomassena joavku vuittii vel dan ge.
Guokte jiehtanasa
Dievdduid finála lei hui buorre čiekčan gehččiide. Hui alla dássi, ja čiekčan manai johtilit. Mii lei mearkkašáhtti lei ahte dievdduid finálas ledje vuot Johansens Utvalgte ja Nagirvári lunttat, nu go diibmá. Geavai maid nu go diibmá, Johansens Utvalgte vuittii 1-0 ja maid dakko bokte olles Nilut Cupa.
Liikká orui čiekčamis nu ahte Martin Persson, gii Nagirvári lunttaid moalas čuoččui, dego galgame beastit iežas joavkku vuoittáhallamis. Son lei issoras buorre. Son bissehii visot spáppaid mat bohte moala guvlui. Son lei maid ovtta ládje dat ágga manin boađus 0-0 lei bealleáiggis.
Doppe lei goitge skuhttár Johansens Utvalgte-joavkkus, Svein Ove Johansen, gii nahkehii dan áidna moala čiekčamis. Nu maid vuite Nilut Cupa.
– Jus dearvvašvuohta bissu, de lean mun boahtte jagi maid dáppe čiekčáme, lohpidii Thomassen njuolga maŋŋel go ledje vuoitán finála.
Sáhttá leat olahus
Ávvir vikkai suokkardit lei go Thomassen mii lea coggalan eanemus moalaid ovtta vahkkoloahpas, muhto ii lihkostuvvan. Liikká lea Thomassen várra okta dain gii lea eanemus moalaid coggalan Nilut Cupa historjjás ovtta váhkkoloahpas. Son lea maid golmma geardde vuoitán «skuhttár» -vuoittu, man oažžu son gii lea eanemus moalaid coggalan. – Láve gaskal 15 ja 17 moala, sullii diekko, coggalan dat gii eanemus moalaid lea coggalan. In dieđe sihkkarit lea go oktage eambbo moalaid coggalan. Vegard Braaten lea vissa maid máŋgii leamaš skuhttáreamos, lohká son.
– Juo, visot manai bures, ja miella lea fas boahtte jagi searvat, logai son.
Birgetmeahttumat
Nissoniid bealis ledje PSG birgetmeahttumat. Romssa joavku geat diibmá maid vuite Nilut Cupa.
Go čiekčan nogai, de ledje sii nahkehan guhtta moala nuppiid mollii, ja vuite maid 6-0.
Nuppe beale šilju lei joavku mas lea issoras ártegis ja guhkes namma, namalassii «Hypernervakustiskediafragmkontravibrasjoner». Muhto dán háve ii lean ávki dakkár guhkes namas.
PSG maid čikče diibmá finála ja vuite. Sii maid faskejedje visot mielde mii juo lei váldimis. Sii ožžo vuoitopokála, sii ožžo johttipokála go leat vuoitán golmma geardde, sin čiekči, Nora Wang, coggalii eanemus moalaid (11 moala) ja sin čiekči, Elin Løvstad, válljejuvvui nissoniid buoremus čiekčin.
Nissoniid finálas ii lean ge goasse eahpádus gii vuoitá, dan mađe olu buorebut ledje go dat nubbi joavku.
Nissonat ovdánan
Kárášjohkalaš Mikkel Nils D. Sara dubmii 25. geardde Nilut Cupas. Son lea leamaš mielde duopmárin álggu rájes. Sus leat diehttelasat
muittut báhcán olu. – Mu mielas leat nissonjoavkkut ovdánan buot eanemus, dan rájes go Nilut Cup álggii. Dan lean mearkkašan. Ja oalle olu ovdánan ge vel. Dál sis lea issoras buorre teknihkka spáppain, ja johtilit manná čiekčan. Diet veahá illudahttá mu, lohká son.
– Mun muittán maid buoremusat daid jagiid go Tippeliga čiekčit leat leamašan, nu go Morten Gamst Pedersen, Dennis Schiller, ja diet olbmát. Dalle lei somá leat duopmárin ja oaidnit sin go čikčet. Leat somás jagit leamašan. Mun gal in heaitte vaikke vel Nilut Cupa nohká. Lean lohpidan searvat duopmárin viidáset, ja lean mielde nu guhká go dearvvašvuohta doallá, lohká son.
Ovttaoaivilis
Nilut Cupa jođiheaddji, Isak Ole J. Haetta, lea ovttaoaivilis Sarain, ahte nissončiekčit leat ovdánan eanemus.
– Juo, oažžu lohkat ahte sis lea eanemus ovdáneapmi leamašan. Dat lea nu buorre ovdáneapmi leamaš ahte sin gaskkas lea nu šaddan ahte deike ii leat beare boahtit ja doaivut vuoitit čiekčamiid. Doppe lea nu alla dássi ahte dat galgá duođai buorre joavku mii vuoitá, ja nu lei ge gal maid PSG, lohká son.
Biras dehálaš
Haetta lohká ahte lea somá go alla dássi lea joavkkuin muđui maid, muhto dat ii oro čikčiid gaskkas dat deháleamos. – Lean hupman olu čikčiiguin, ahte manin vulget Guovdageidnui spáppa čiekčat juohke jagi. Sii lohket ahte cupa lea somá, muhto biras maid ja deaivvadit ođđa olbmuiguin. Dan jáhkán leat dehálažžan oažžut mielde viidáseappot, lohká son vel loahpas.