Deanu joatkkaskuvlla berre seailu
Olgešbellodaga joavkojođiheaddji Finnmárkku fylkkadikkis, Jo Inge Hesjevik, lea gieskat ovddidan evttohusa ahte heaittihit Deanu ja Várggáid joatkkaskuvllaid. Ságat aviissa dieđuid mielde šaddá Finnmárkku fylkkagielda seastit boahtte jagi 62 miljovnna ruvnno. Olgeža joavkojođiheaddji oainnu mielde sáhttá oasi dan seastimis máksit joatkkaskuvllaid heaittihemiin. Lea oalle healkkehahtti «riegádanbeaiskeaŋka» man Olgešbellodat áigu addit Deanu joatkkaskuvlii mas dán jagi lea 100 jagi ávvujahki.
Skuvla ásahuvvui ge 1918:s ja lea molson nama golbmii dan rájes. 1923:s rievdadedje skuvlla nama Finnmárkku eanadoalloskuvlan. 1940:s válde Duiskka soalddáhat badjelassii skuvlla ja buot oahpahus fertii bissehuvvot, ja 1944 čavčča boldui skuvla. Skuvla huksejuvvui seamma báikái maŋŋel soađi ja 1965:s huksejuvvui ođđa skuvla. Ovdal dan ledje oahpahusat čađahuvvon eará visttis. Borgemánus 1994 válddii dasto Finnmárkku fylkkagielda badjelasas skuvlla doaimma. Dan oktavuođas molssui skuvla nama Deanu joatkkaskuvlan.
Lea oalle healkkehahtti «riegádanbeaikeaŋka» man Olgešbellodat áigu addit Deanu joatkkaskuvlii mas dan jagi lea 100 jagi ávvujahki.
Dan rájes lea Finnmárkku fylkkagielda hoiden skuvlla, muhto dál, 24 jagi maŋŋel go válde badjelassii skuvlla, de fas evttohit politihkkarat heaittihit skuvlla. Dan leat ovdal maid dahkan. Deanu joatkkaskuvla lea ge máilmmi davimus eanandoalloskuvla, gos oahppit ohppet árktalaš eanandoalu, heasta- ja heastagámahanfága ja ohppiide addo maid fálaldat oažžut oahppogelbbolašvuođa. Skuvllas lea maid sierra «beanalinnjá». Skuvla fállá maid ohppiide vejolašvuođa válljet reálafágaid. Deanu joatkkaskuvla lea ge nu erenoamáš joatkkaskuvla mii berre seailluhuvvot. Dávjá lea sáhka dan birra, ahte skuvla lea beare boaittobealde, nu ahte nuorat eai hálit dohko fárret. Das ferte dieđus skuvla maid váldit oahpa, ahte buorebut márkanfievrridit iežaset skuvlla vai nuorat, geain lea beroštupmi elliin ja omiin, bargat álkibut fuomášit dan erenoamáš skuvlla.
Jáhkkit buoremussan jus stáhta váldá badjelassii Deanu joatkkaskuvlla seamma láhkai go sámi joatkkaskuvllaid mat leat Kárášjogas ja Guovdageainnus. Dat dáhkidivččii buorebut ruhtadeami boahtteáigái, ja dasto dieđus ferte skuvla bidjat ollu eambbo návccaid oažžut ohppiid ohcat sin skuvlii. Mis lea jáhkku, ahte árktalaš eanandoalus lea čuvges boahtteáigi, go dat lea iešalddis juo gálvomearka. Jáhkkit maiddái stuorra dinenvejolašvuođaid árktalaš guovlluid buktagiin. Danne dárbbašuvvo ge sierra joatkkaskuvla mas lea guovddážis árktalaš eanandoallu.