– Čuhppe báddema nu mun aivve rámpon
Moaitá «Muitte mu» prográmma:
Dovddus sámi artista ii vuolgán šat «mentorin» nuppi «Muitte mu» prográmmaráidui, go lei duhtameahttun NRK Sámiin.
Dovddus sámi artista ii vuolgán šat «mentorin» dan nuppi «Muitte mu» prográmmaráidui, go lei duhtameahttun NRK Sámiin.
Goalmmát artista almmuhii iežas buktaga mannan lávvordaga NRK ráiddus «Muitte mu», mas sámi artista galgá oahpahit rivgu dahje dáčča dahkat luođi ja juoigat dan. Mannan lávvordaga lei artista «MIIA» gii juoiggai iežas edno, Joachima. Juoigi Johan Anders Baer lei mentor, dahje oahpaheaddji.
Ovdagáttuid njeaidit
Dovddus sámi artista, Sara Marielle Gaup Beaska, lei mielde dan vuosttaš ráiddus man NRK čájehii. Son oahpahii Elisabeth Andreassona dahkat luođi ja juoigat dan. Go nubbi ráidu galggai báddejuvvot dán jagi, de diehttelasat jerre Sara Marielles fas leat mielde, muhto son ii vuolgán šat mielde, go son ii lean duhtavaš movt maŋemus manai suinna.
– Go ledjen vuosttaš ráiddus mielde, de doivon ahte prográmma ulbmil lei ovdagáttuid njeaidit. Muhto duohtavuođas lei dušše oažžut eanemus lágiin gehččiid, lohká son.
Beahtahalai
Sara Marielle muitala ahte go prográmma lei gárvásii čuhppon ja čájehan ládje, de ledje su bidjan dakkárin gean mielas lei visot nu buorre dainna juoigamiin.
– Dat ii lean buorre, go dat lei eambbo dego lávlla. Dan mun lohken Elisabeth Andreassonii, ahte dat lei eambbo lávllaluohti go luohti. Muhto mun dohkkehin dan go son nagodii dovdduid ovdanbuktit luođis. Go dan čuhppe eret, de šadden mun dego dakkárin gii aivve rábmojin. Duohtavuođas dat ii lean nu, ja dainna mun beahtahallen, lohká son.
Čuovvu kultuvrra
Son lohká ahte duohtavuođas ii leat visot luohti mii ovdanbukto ja dan ii oaččo NRK ovdan prográmmas.
– Sii čájehit dainna prográmmain ahte juohkehaš gii rahpá njálmmi, de lea luohti, muhto nu dat ii leat obanassiige. Sii eai beassan oahppat min kultuvrra birra maidege. Dan ferte máhttit ja diehtit, go luođi galgá dahkat, lohká son.
– Munnje lea luohti olles mu leahkin, dat čátná mu iežan álbmogii ja guvlui.
– Mun ledjen plánenčoahkkimis, muhto doppe eai váldán vuhtii sápmelaččaid oaiviliid obanassiige. Livčče maid sáhttán doallat álbmotčoahkkima dan oktavuođas. Sii geat árvvoštalle prográmma ledje aivve dáččat ja rivgut, ja dat ii leat mu mielas riekta šaddan obanassiige, lohká son. – Mii livččii ulbmiliid álbmotčoahkkimis?
– Na dál han lea NRK Sápmi beare váldán luođi nu eai leat gulahallan álbmogiin ge. Áigu go álbmot addit luođi dákkár prográmmii. Jus dan háliida álbmot, de han lea áibbas ortnegis, ja jus eai hálit, na dalle ii leat riekta joatkit dainna, lohka son.
– Mun lean ieš válljen go lean artista, ahte mun juoiggan eambbo lávllaluđiid, go mun in áiggo min árbevirolaš luđiid máilbmái addit. Dat leat nu divrras munnje ja mun lean de válljen lávllaluđiid juoigat máilbmái, lohká son.
Váldit ruovttoluotta luođi
Kárášjohkalaš Laila Somby Sandvik ii ge leat duhtavaš nu movt dál NRK:S ovdabuktu luohti. Son lea seamma oaivilis go Sara Marielle, ahte ii visot leat luohti mii njálmmis boahtá olggos. Su mielas maid galggašii sámiid várás dat prográmma, ii ge dáččaid ja rivguid várás.
– Mu mielas livčče galgan baicca sámi dovddus olbmuid oahpahit juoigat. Addit sidjiide vejolašvuođa dego váldit luođi ruovttoluotta. Vaikke buot golmma sámedikkiid presideanttaid oažžut mielde, lohká son.
– Livččii maid galgan eambbo oahpahus luođi birra, vai dovddusmahttet min kultuvrra. Dál leat dat luođit mat ovdanbuktojit lávlagat. Mieđihan ahte leat dego dakkárat mat sulastahttet muhtun sajii luohtái, muhto eai leat luođit, dat leat luohtesullasaš luođit. Lea dego musihkka mii stivre luođi, ii ge luohti mii stivre musihka, lohká son.