Ollu iešguđetlágan gálvvut ja buorre gálvojohtu
Máret Gunhild Bongo ja Anders P. Bongo leaba vuovdán dujiid juohke jagi Guovdageainnu duodjemárkaniin. Máret Gunhild muitala ahte soai jođiheaba ullogápmagiid buot eanemusat. Soai láveba maid vánddardit ollu iešguđetlágan márkaniin ja festiválain, muhto Guovdageainnu duodjemárkaniin gal johtá gálvu buoremusat. Erohus lea maid ahte duodjemárkaniin jođiheaba eanas atnugálvvuid ja festiválain dahje geasset earálágan gálvvuid. Ruošša bealde, Lujávrris, leigga boahtán Zoja Galkina (olgeš bealde) ja Anastasia Johansen (gurut bealde) vuovdit iežaska dujiid, ja lea goalmmát jahki go leaba Guovdageainnu duodjemárkaniin. Earret eará vuovdiba veaskkuid mat leat gorrojuvvon luossačuomas ja daid soai lohkaba hui bivnnuhin. Soai maid láveba mátkkoštit iešguđet márkaniin, muhto leaba ovttaoaivilis ahte Guovdageainnu duodjemárkaniin jođiheaba buot eanemus gálvvuid. Čiŋat gávppi eaiggát Berit Anne Haetta Eira (olgeš bealde) ja su nieida Ellen Aina Eira (gurut bealde) muitaleaba ahte vaikko Čiŋat rámbuvri lea gilis, de liikká gánnáha sirdit gávppi duodjemárkaniidda. Biret Ánne muitala ahte go leat ollu olbmot geat bohtet eará báikkiin, de eai soaitte astat gili gávppiin mannat, dušše duodjemárkaniin. Son muitala maid ahte erohus duodjemárkaniin ja eará márkaniin ja festiválain lea ahte festiválain eai láve gal hearvabáttit johtit, muhto muđui gal jođiha sullii seamma duodjemárkaniin ja festiválain.