Ávvira gilvvuid vuoitit
Ávvir lei dán jagi Guovdageainnu duodjemárkaniin ja doppe lágideimmet feara makkár gilvvuid. Dás oainnát geat vuite gilvvuid.
Mánáide lei sierra gilvu, namalassii tevdnet gova Ávvira bargis. Olu mánát serve gilvui ja mii oaččuimet olu fiinna ja somás govaid. Dáid govaid beassabehtet čuovvovaš vahkuid oaidnit Ávvira mánáidsiidduin bearjadataviissain.
Buot oasseváldiid gaskkas vuorbádeimmet vuoiti, ja son gii vuittii skeaŋkka Ávviris lea Eila Máren Buljo.
Dovdá bures Ávvira
Guovdageainnu duodjemárkaniin hástaleimmet olbmuid searvat gažaldatgilvui «Man bures dovddat Ávvira». Gilvvus ledje gažaldagat Ávvira historjjá birra ja aviissa sisdoalu birra. Čájehuvvui ahte olbmot dovdet aviissa bures, go eatnasat ledje vástidan riekta gažaldagaide. Rievttes vástádusaid gaskkas vuorbádeimmet ovtta vuoiti: Ellen J. Haetta. Son vuittii Ávvir čeabetliinni, termosa ja njálgáid.
Ozai ja vuittii gaskabeivviid
Logi jagi beaivvi bođii avvir.no siidui ođđa fálaldat lohkkiide, namalassii digitála vuorká gos leat ovddeš sámi aviissat. Vuorkkás leat buot Áššu ja buot Min Áiggi aviissat. Duodjemárkaniin oahpisteimmet lohkkiideamet dán vuorkái, go čájehuvvo ahte leat oallugat geat eai vel dieđe ahte sáhttá doppe geahččat ovddeš sámi aviissaid.
Min lohkkit ledje áŋgirat geahččalit ohcat Ávvira digitála vuorkkás, ja nagodedje maid gávdnat ovddeš aviissain boares áššiid maid leimmet hástalan ohcat. Mii vuorbádeimmet vuoiti sin gaskkas guđet serve gilvui.
Sara Inger Siri Buljo lei okta sis gii geahččalii ohcat min digitála vuorkkás. Son beassá dál bovdet muhtuma mielde borrat gaskabeivviid hoteallas. Dat lei dán gilvvu vuoitu.