– Muhtun dálá sámi artisttat juiget Banana Airlines luđiid
Sančuari njunuš oaivvilda muhtun sámi artisttain lea luohtedássi «Banana Airlines» dásis, ja dan dási gal su mielas dollet «Muitte mu» prográmmas maid.
Ávvir lea čállán ovddit beivviid go dovddus sámi artista, Sara Marielle Gaup Beaska, moaitá NRK Sámi go su leat nu poisitiivan ráhkadan vuosttaš jagi «Muitte mu» Tv-ráiddus, mas son lei luohteoahpaheaddji. Ieš son lohká iežas leamaš kritihkalažžan, ja gohčodan Elisabeth Andreassona ovdabuktiima luohtelávllan, muhto dan leat NRK:S čuohppan eret. NRK Sámi prográmmajođiheaddji, Ole Rune Haetta, mieđiha ahte leat luohtelávlagat, muhto dadjá ahte leat liikká luođit go máŋgga eará sámi artisttas ja rockajoavkkuin.
Banana Airlines luođit
Sánčuari njunuš, Heaika Haetta, lea ovttaoaivilis Ole Rune Haettain dakko bokte, go su mielas leat olu sámi artisttain luođit mat leat nu lahka lávlaga go oba sáhttet ge.
– Jus mun ná logan. Sámis leat mii cuiggodan Banana Airlines, go dat juige iežaset lávlagiin dás 20-30 jagi áigi. Dađi bahábut leat dál sámi artisttat mat juiget juste seamma ládje ja seamma dásis. Luođit mat dalle ledje sis, masa Sámis ledje hui bahát, dat luođit leat dál dohkkehuvvon. Jus Ole Rune Haetta buohtastahttá «Muitte mu» luđiid daiguin luđiiguin, de gal leat mu mielas sus riekta, lohká son. – Geat dat leat geaid don dál oaivvildat juiget dego Banana Airlines? – Dan in beroš mun dás álgit muitalit, muhto dat gullojit sámerádios duos dás, vástida son. Banana Airlines lea dáčča joavku, geat ráhkadedje lávlagiid main oassi lávlagiin lei maid luohti. Ear- ret eará «Jompalaya», «Vadsø», «Sámi Rappi», ja nu ain, gos dávjá lávlu, Kai Kiil, lávllui hui heajos dárogielain ja dávjá láhttii dego gárremiin livččii.
Buoret mađi eambbo gáidá
Haetta čilge ahte sáhttá leat oarjemáilmmi musihkka mii báidná nuoraid maid Sámis, go liikojit dakkár luohtái mii lei sin mielas dádjunluohti.
– Mun láven ná čilget. Mun tevdnet gráfa mii manná bajás guvlui. Mađi guhkkelii dat sárggis boahtá sámi vuođđoluođis, de dađi eambbo dáččat ja rivgut liikojit dasa. Nu orrot sámi nuorat maid dán aigge, lohká son.
– Movt «Muitte mu» luođit leat sámi árbevirolaš luođis eret?
– Luohti lea sámi blues, ja dan bluesa ii várra nagot deaivat eambbo sápmelaš. Jus luođi galgá juoigat, de galgá gávdnat luohtenearvva, dat mii dahkat ahte guolggat ceakkagit, jus mun nie logan. Dan eai deaivva «Muitte mu» luođit. Sii leat čeahpit, buorre jietna, sii leat profešuneallat, muhto luohtenearvva eai deaivva gal, vástida Haetta.
Sáhtášedje joksat alla dási
Felgen Orkestera njunuš, Morten Ailo Haetta Hansen, oaivvilda ahte luođis leat maid šáŋŋerat šaddan dál ođđaáiggis.
– Mu mielas leat šáŋŋerat šaddan. Muhtun lea árbevirolaš luohti, ja leat luohtelávlagat, ja maid lávlagat mat leat inspirašuvnna ožžon luođis, lohká son.
– Mu mielas leat ollugiin dain, geat leat «Muitte mu» prográmmas, vejolaš olihit alla juoigandási, jus eambbo juoiggaše. Muhto nu go dál lea, de ii leat gal lahka ge juoigandási, lohká Haetta Hansen.