Ohcciid gaskkas ii lean dat kandidáhtta gean sii ohce
NRK Sápmi lei almmuhan ođasredaktevravirggi gieskat. Dál leat sii mearridan almmuhit virggi ođđasit.
Go NRK Sápmi almmuhii ođasredaktevravirggi gieskat ja dalle čálii Ávvir ahte NRK Sápmi lei ožžon moaitámušaid sihke Sámi Journalistasearvvis (SJS) ja maiddái Sámi prográmmaráđis go virgealmmuhusas ii deattuhuvvon ahte ohccis galgá sámegielmáhttu.
SJS nubbejođiheaddji Anna Sunna logai dalle earret eará ahte lea eahpitkeahttá ahte ođasredaktevra ferte máhttit sámegiela ja ahte dál lea nuppes oanehis áiggis go NRK Sápmi ii vuorut sámegielmáhtu virgebidjamiid oktavuođas.
Sámi prográmmaráđi jođiheaddji, Liv Inger Somby, logai dalle ahte sii deattuhit hui garrasit ahte lulli-, julev- dahje davvisámegiella ferte vuoruhuvvot dán virgái ja sii vurdet ahte dat gii lea ođasredaktevra máhttá unnimusat ovtta sámegiela.
Ohcciidproseassa čađahuvvon
NRK Sápmi oaččui mannan virgealmmuhussii njeallje ohcci: - Eira-persson, Sara Beate (36), Studeanta ja Ávvira ovddeš váldodoaimmaheaddji, Guovdageaidnu, Norga
- Ii almmolaš, dievdu **** **** - Utsi, Johan Ante (39), Praktikánta, Guovdageaidnu, Norga - Ii almmolaš, nissonolmmoš ****
Almmuhan ođđasit
NRK Sámi hoavda Mona Solbakk muitala ahte sis lea leamaš proseassa ohcciid gaskkas ja maŋŋel dan leat mearridan ahte sii almmuhit virggi ođđasit.
– Mis lea sámi stuorámus ođasdoaimmahus, mii galgá jođihuvvot ođđa gáibideaddji rievdadusaid mielde. Mii dárbbašit nanu jođiheaddji geas lea earenoamáš áddejupmi ja dovdá dan mediaservvodaga mii mis lea dál. Ohcciidproseassa maŋŋel mii leat mearridan almmuhit virgealmmuhusa ođđasit.
Viidásit čilge son ahte ohcciid gaskkas ii lean dat kandidáhtta maid sii ohce ja danne fertejit ođđasit almmuhit. NRK Sámis lea hui guhkes ja nana historjá sáddemis. Dál leat sii dan dilis go olbmot válljejit maid háliidit, ja ođđa buolvva olbmot eai geahča TVsáddagiid ja guldal rádio seamma struktuvrrain masa sii leat hárjánan.
Solbakk lohká ahte dál lea hui dehálaš ahte sii nákcejit dan ođđa mediamáilmmis ráhkadit ja ovdánahttit fálaldagaid. Danne dárbbahit jođiheaddji gii nagoda olles organisašuvnna oažžut mielde ovdánahttit sihke iežaset, sin buktagiid ja fálaldagaid.
Ii dieđe vuos boahtá go sámegielgáibádus
Solbakk ii loga vuos digaštallan dahje árvvoštallan rievdadit go virgealmmuhusas maide, ja biddjo go sámegielgáibádus, nu go sihke SJS ja Sámi prográmmaráđđi leat ávžžuhan.
Son lohká ahte nu go son mannan háve logai, de sii almmuhit golmma sámegillii ja dárogillii buktagiid, nu ahte sii eai sáhte gáibidit ja vuordit ahte jođiheaddji hálddaša buot gielaid. Muhto mis lea dieđus hui gáibideaddji giellahástalus, lohká Solbakk. Viidásit son lohká:
– Dieđusge galggašii min ođasredaktevra máhttit ja ipmirdit eanemuslági mielde buktagiid maid mii buvttadit. Muhto mis lea dieđus hui gáibideaddji giellahástalus.
Solbakk deattuha vel ahte lea dehálaš ahte ferte leat nana jođiheaddji gii ipmirda dan ođđa mediadili ja nákce min doalvut boahtteáigái.
Almmuhit ođđasit farggamusat
Solbakk muitala ahte sii áigot dán vahku mielde juo almmuhit ođđasit virgealmmuhusa. Son sávvá buriid ohcamiid ja ahte oallugat ohcet. Go sii duođas háliidit ohcat ja gávdnat rievttes jođiheaddji.
Solbakk lohká maid ahte sii fertejit várra ieža maid álgit aktiivvalaččat ja iešguđet vugiid mielde ohcat kandidáhtaid, muhto sávvá ahte bohtet almmuhusa oktavuođas buorit ohcamat.
Ođđa virgealmmuhusa oktavuođas áigot maid árvvoštallat ja geahččat galgá go almmuhuvvot ahte ođasredaktevrra bargosadji galgá leat Kárášjogas, gos NRK Sámi váldodoaimmahus ja eanas sin bargit leat. Muhto lohká ahte lea lunddolaš ahte ođasredaktevra lea hui oidnosis ja guovddážis doppe gos eanas oassi bargiin leat.
Vuordá ahte dál biddjo sámegielgáibádus
SJS nubbejođiheaddji Anna Sunna lohká sin gal vuordit dál ahte ođđa virgealmmuhussii lasihuvvo gáibádussan ahte ohccis galgá leat sámegielmáhttu unnimusat ovtta dain sámegielain maid NRK Sápmi atná.
Sunna lohká maid ahte son ii doaivvo ahte lea váttis gávdnat olbmo ođasredaktevravirgái geas lea sihke obbalaš journalisttalaš gelbbolašvuohta ja maiddái sámegielgelbbolašvuohta, earenoamážit Norgga beale Sámis. Nu ahte sus gal lea buorre doaivva ja vuordámuš ahte NRK Sápmi gávdná dál olbmo virgái geas leat goappaš gelbbolašvuođat.