Atná vahágin jus Sámi heahte- ja inseastaguovddáš heaittihuvvo
Alma Helandera mielas lea hui šállošahtti jus aidná sámegiel heahte- ja inseastaguovddáš heaittihuvvo.
– Lea hui šállošahtti jus Norgga áidna sámegiel heahte- ja inseastaguovddáš heaittihuvvo, lohká Sámi heahte- ja inseastaguovddáža sadjásaš jođiheaddji Alma Helander. Kárášjoga gielddas leat ekonomalaš hástalusat ja maŋemuš jagiid leat sámi heahteja inseastaguovddáža áitán heaittihit, ja dál ballá Helander heaittihanáitaga duohtan šaddamis.
Gealbu lea gielddas
Finnmárkku fylkkamánni lea bearráigeahččan fálaldaga ja lea cuiggodan máŋga váilevašvuođa bálvalusas. Earret eará lea sáhka visttis ja bargiid váilevaš gelbbolašvuođas.
– Mun gal oainnán ahte livččii vejolaš njulget váilevašvuođaid, muhto gieldda ekonomiija lea heittot ja dan duohkai bissána. Fálaldat maid mii addit lea hui dehálaš, vaikko lea gelbbolašvuohta cuiggoduvvon, de oainnán ahte gielddas siskkáldasat livččii dat gealbu mii dárbbašuvvo, dadjá Alma Helander.
Geavahit bálvalusa
Son lohká dássážii leat golbma nissonolbmo ja máná idjadan heahteguovddážis dán jagi, muđuid leat sihke almmáiolbmot ja nissonolbmot váldán njálmmálaš oktavuođa guovddá- žiin. Alma Helander lea 27 jagi bargan heahteguovddážis iige loga vuohttán rievdadusaid. Sámis lea ain vuohki čiegadit ja geahččalit čoavdit váttisvuođaid siskkáldasat bearrašis. Son muitala ahte maŋemuš jagiid leat unnit geavaheaddjit leamašan, muhto ovdal leat leamašan beanta dievva muhtun áigodagaid.
– Dán jagi eai leat leamašan nu ollu geavaheaddjit, muhto máŋgii lea leamašan viehka dievva jahkásaččat, ja leat olusat geat váldet oktavuođa telefovnna bokte. Sávan politihkkárat bivdet maŋidit ášši, nu go sis lea vejolašvuohta, lohká Helander. Son dáhtošii gávdnot čovdosa doalahit Sámi heahte- ja inseastaguovddáža Kárášjogas.
Guhká áitojuvvon
Alma Helander vásiha ahte olusat eai dieđe ahte Kárášjoga gielddas lea Sámi heahte- ja inseastaguovddáš, ja jáhkká ollu eambbosat livčče geavahan fálaldaga jus gielda livččii čeahpit čalmmustahttit bálvalusa.
– Min bálvalusa leat nu guhká áitán heaittihit, nu olbmot eai oba dieđege ahte mii addit ain bálvalusa, dadjá son.
Kárášjoga gielddastivra meannuda ášši juovlamánu 10. beaivvi.