– Givssideapmi lea áibbas dohkketmeahttun
– Min skuvllas lea ovdamearkka dihte prográmma mii lea jođus ja ollu njuolggadusat main galgat eastadit givssideami, dadjá rektor Jan Gunnar Johansen.
– Dábálaččat mii čuovvulit givssidanáššiid ovttatmano, ja munnje lea imaš jus dát ášši ii leat čuovvoluvvon. Givssidanáššit leat vuoruhuvvon buot bajimussii mis, dadjá skuvlla rektor Jan Gunnar Johansen.
Buot skuvlla bargit dihtet ahte sii leat geatnegahtton bargat eastadan dihte givssideami ja skuvllas leat čađahan bargiidčoahkkimiid gos givssideapmi lea leamaš fáddán.
Johansen muitala ahte sis leat bargovuogit maid sii čuvvot, ja su mielas lea viehka imaš jus dat eai leat čuvvojuvvon dán áššis.
– Givssideapmi lea áibbas dohkketmeahttun. Eastadit givssideami lea vuoruhuvvon min skuvllas, ja lea áibbas dohkketmeahttun ahte mánát givssiduvvojit ja eandalii jus dat dáhpáhuvvá seamma mánáiguin áiggi badjel, dadjá Johansen.
Váldá oktavuođa etniin
Rektora mielas lea áibbas dohkketmeahttun ahte sin skuvllas leat givssidandáhpáhusat ja son čilge ahte ášši galgá čuovvoluvvon, muhto dávjá sáhttá givssidanáššiin leat nu ahte jus eai gulahala váhnemiiguin, de sáhttá ádjánit čoavdit ášši.
– Mun in sáhte vástidit mii áššis lea dahkkon, muhto mu mielas lea hui ártet jus ii leat mihkke dahkkon. Mun lean bargiide addán dieđu ahte givssidanáššiid galget vuoruhit. Ferten iskat mii dán áššis lea dáhpáhuvvan ja ahte válddán oktavuođa etniin. In sáhte eará vástidit, dadjá Johansen.
Dávjá lea nu ahte givssidan áššiin leat guokte beali ja ahte nuppit váhnemat eaba mieđit ahte sudno mánná givssida.
– Givssidanáššit leat dávjá váttes áššit, muhto go váhnemat váldet ášši duođas ja ovttasbarget, de lea álki dainna bargat. Jus sii čuoččuhit ahte sin mánát eai givssit, de šaddat dávjá váldit oktavuođa olggobeale ásahusain ja dat gal sáhttá váldit guhkes áiggi, čilge rektor ja joatká:
– Lea maid nu jus váhnen riŋge munnje ja muitala ahte su máná givssida namahuvvon mánná, de in sáhte mun muitalit váhnemii makkár doaibmabijuid mii bidjat johtui namahuvvon mánnái. Sus lea maid suodjalus dan ektui, dađi bahábut.