– Mihttu lea olmmošvuoigavuođa áššiiguin bargagoahtit
Norgga našunála olmmošvuoigatvuođa institušuvnna (NIM) Guovdageainnu ossodat leat vuosttaš geardde váldán vuostá juridihka bargohárjehalliid. Mihttu lea eambbo dovddusin dahkat sin institušuvnna.
Soai geat leaba vuosttažat, leaba njealját jagi Romssa juridihkalaš fakultehta njealját jagi studeanttat. Soai leaba Viestterállasa nieida Marthe Berglund (26) ja kárášjohkalaš Elle Risten Anti (24).
Olmmošvuoigatvuohtaberoštupmi
Goappašagat muitaleaba ahte sudnos lea mihttu čiekŋudit olmmošvuoigatvuođa juridihkkii.
– Boahtte jagi galgat mii čiekŋudit ovtta fáddái, ja mun áiggun čiekŋudit olmmošvuoigatvuođa áššiide. Mus lea earenoamáš beroštupmi dan suorgái, ja beassat NIM:I bargohárjehallamii lei mu sávaldat. Nu lean duhtavaš go bessen deike, muitala Elle Risten Anti.
– Juo, dat šaddá olmmošvuoigatvuohta masa čiekŋudan, ja danin ledjen ge maid sávvan beassat bargohárjehallamis olmmošvuoigatvuođa áššiiguin bargat, lohká Marthe Berglund.
Ovdamunni
Anti lohká ahte son jáhkká alddis leat ovdamuni jus galgá sámi vuoigatvuođaiguin bargat, go lea sápmelaš ieš.
– Lea olu juo maid dieđán sámi birrasa birra, ja danin jáhkán dat lea munnje veahá ovdamunni jus de galggan bargat áššiiguin main sámi vuoigatvuođat leat fáddán, lohká son.
Oahppan olu
Berglund ii lean sávvan Guovdageidnui vuolgit bargohárjehallamii, muhto dál lea hui ilus go juste Guovdageidnui beasai.
– Mun lean nu olu oahppan, ja maid lean beassan geahččalit juridihka atnit bargodilis. Dán rádjái mii leat dušše teoriijaid oahppan, muhto dál leat beassan daid geahččalit albma barggu bokte ja dat lea mávssolaš leamaš. Dasa lassin in gáđa go deike bohten, go lea nu buorre biras ja alla dássi fágalaččat, lohká son.
Vaikke NIM:I
Anti rámpo maid bargobirrasa ja fágalaš dási. Sutnje ii leat amas jurdda NIM:S beassat bargat boahtteáiggis.
– Na dat gal sáhttá leat juoga maid sáhtášin jurddašit, NIM:S boahtteáiggis bargat. Nu miellagiddevaš go lea juste dat fága mas mun beroštan, ja mainna háliidan joatkit, lohká son.
Soai leaba leamaš njeallje vahkku Guovdageainnus NIM:S, muhto odne lea maŋemus beaivi barggus dán hávvái.
Dovddusin dahkat
Juridihkalaš ráđđeaddi NIM Guovdageainnu juridihkalaš ráđđeaddi, Mari Marte Kobberstad Tingelholm, lea son geas lea leamaš ovddasvástádus dan guovtti bargohárjehalliide. Son muitala ahte mihttu sis lea dahkat NIM Guovdageainnu dovddusin jurdihkkastudeanttaide.
– Mii háliidat maid rekruteret ođđa bargiid, ja bargooahpahallama bokte lea hui buorre vejolašvuohta oahpásmuhttit juridihkkaohppiid min bargosadjái, muitala son.
Hástalan
Kobberstad Tingelholm muitala ahte sii leat geahččalan maid hástalit bargohárjehalliid bargguiguin maiguin ferteba veahá bargat.
– Soai leaba hui čeahpit ja leaba hástaleaddji bargguid čoavdán bures. Sávvamis sudnos leat buorit vásáhusat leamaš ja ahte dá lea bargosadji gosa soaittášeigga háliidat boahtteáiggis, lohká son vel loahpas.