Ođđa CD – man berret guldalit albma rusttegiin
Sagittarius lea almmuhan ođđa skearru. Sii háliidivčče ahte olbmot guldalit dan albma rusttegiin, ja danne ii boađe dat eambbo CD hámis.
Sagittarius joavku lea álgán čuojahit juo 80-jagiid loahpageahčen. Ođđa skearru, mii dál lea ilbman, «Loahpa Jienat 2», lea joatkka dan ovddit olles skearrus man almmuhedje juo 1993:s, 25 jagi áigi.
Luondu fas ealáska
Duođalaš fáddá lea maiddái dán skearrus.
– Dát lea njuolgut joatkka min vuosttaš skearrus, ja muitala historjjá mii dáhpáhuvai maŋŋel go nogai buot eallin eatnama alde, go nu han nogai «Loahpa jienat 1». Lea hui duođalaš fáddá, mas teavsttain muitaluvvo ahte olmmošvuohta ii nagot áimmahuššat eatnama, ja nu duššaduvvo buot. Dás lea fas muitalus movt luondu ieš fas ealáska.
Goalmmát vokalista
Roy Alexander Lind lea čađat jođihan Sagittariusa ja čuojaha rumbbuid. Muđui čuojaha Kurt Eilif Haetta gitára, Odd Erling Simensen bássa, Per William Hermansen syntha, ja Anne Gro Gaup lea dál goalmmát vokalistan. Lind muitala sii leat dál álkidahttán musihkaset.
– Mii leat geahččalan ovdánit progrockas. Dat lea suorgi man lea dábálaš olbmui váttis olahit. Leat danne geahččalan álkidahttit vuogi ja máhccat nu min ruohttasiidda, čilge Lind.
Eai hálit digitála dássái
Lind muitala sis leat oktiibuot logi almmuheami oktan CD, EP ja muhtin digitála almmuheamit. Muhto «Loahpa jienat 2» ii galgga almmuhuvvot eambbo Cd-skearrun.
– Streamenbálvalusaid geažil leat olbmot vajálduhttán guldalit musihka albma jienain. Buorre jietna ii boađe dain rusttegiin mai- guin čuojahat musihka maid leat viežžan Itunesis, amazon.comas dahje Spotifys. Leat olu smávva detáljat maid berrešii gullat, ja vásáhus lea áibbas eará go gullá buot. Lea maid hui somá go olbmot mis ostet njuolga dan skearru, dadjá son ja lasiha son lea hui giitevaš go Sámediggi lea dorjon skearru ráhkadeami, go ii muđui livčče dát ollašuvvan sis.
Studio Sámis mielde
Eai sii áiggo doallat gal almmuhankonseartta. Lind leaikkastallá ahte sin oasálastin NRK Sámi TV prográmmas Studio Sámis aaoažžu leat sin almmuhankonsearta.
– Dál sávan ahte skearru lokte fas Sagittariusa ja olbmot olles Sámis fuomášit min musihka, dadjá Roy Alexander Lind.