GUMPE DETTIII measta 50 kilo
Gumpe, man mannan duorastaga báhče Áiteváris, Kárášjogas, lei mealgat stuorát go ovddit gumpe. – Illubeaivi, lohká boazosápmelaš.
Kárášjoga gielddas leat guokte gumppe báhččon dán jagi, guktot gumppet leat goddán bohccuid. Duorastaga birrasii diibmu 11.30 báhččui gumpe mii galgá goddán bohccuid maŋimuš vahkku. Dat lea mealgat stuorát go ovddit gumpe, mii dettii birrasii 35 kilo, dát gumppe dettii 48,5 kilo.
– Illubeaivi
Skuohttanjárgga ovdaolmmoš Mikkel Sara lohká dan illubeaivin, ja čujuha ahte gumpe ii galgga leat Finnmárkkus ja nu lea ills go gumpe báhččui.
– Lea áibbas čielggas ahte diekkáriid ferte seammás báhčit eret go bohtet eallu sisa. Eai gula deike, nu ja lei hui buorre ja illudahtti go fidniimet dán ge, lohká Mikkel Sara, guhte maiddái dán háve lei helikoptera mielde.
Stáhta álggahii bivddu
Gumppebivdui ii leat ohccon báhčinlohpi, muhto Birasdirektoráhtta mearridii gaskavahkku guorrat ja báhčit gumppe go maŋimuš beivviid leat gávdnon máŋga ráppi. Lei Stáhta Luonddubearráigeahčču guhte čađahii bivddu.
Ii fitnan ealus
Mikkel Sara muitala ahte erohus dán gumppes ja nuppi gumppes lea ahte sii nagodedje doalahit dan eret ealus.
– Dát gumpe ii fitnan ealu siste, muhto gottii bohccuid mat eai lean ealus, dadjá son.
Dihte gos lei
Skuohttanjárgga ovdaolmmoš ii loga nu njuovžilit dán háve ožžon báhčinlobi. Son lohká gulahallan Birasgáhttendirektoráhtain ja gáibidan jávkadit gumppe ovdal go stuorra vahágiid dahká.
– Dál álget dálvvesiiddat boahtit ja dalle lea váddásat vuohttit go ollu bohccoluottat šaddet. Nu lei hui dehálaš jávkadit dan dál vai ii beasa hearjidit ealus, čilge Sara. Son lohká máŋga jándora guoradan gumppe, ja nu leat diehtán čađat gos dat lea.
– Mii leat sihke guoradan ja oaidnán dan, nu lei dihtosis gos gumpe lei. Mis lei olmmoš guhte čuovui mielde maid bargá ja gos dat lea, lohká son.
Boraspiret stuorra vahágin
Boazosápmelaččat jahkásaččat masset ollu bohccuid boraspiriide. Mikkel Sara lohká leat váttisin birget ja eastadit vahágiid go boraspiret speadjagohtet.
– Mu mielas orrot eambbo ja eambbo boahtimin gumppet, ja lea hui ártet go oanehis áiggis leat guokte gumppe speadjan, lohká Sara, guhte muitá maŋemuš 2010:s vuohttán gumppe ealloravddas.
– Boraspiret leat stuorra hástalussan boazoealáhussii, ja dát návdi, gumpe, ii galgga dáppe. Jus dat beassá ealu sisa nu go ovddit gumpe, de gal lea stuorra vahát, lohká son. Sara muitala iežaset nagodan doalahit gumppe Iešjoga alde bajábealde Šuošjávrri.
Vuosttaš luođain jámii
Stáhta Luonddubearráigeahču bargi Oddleif Nordsletta bážii maiddái dán gumppe, ja lohká ovtta luođa geavahan.
– Dát lei maid rávjágumpe nu go ovddit, muhto dettii eambbo. Dát jámii vuosttaš luođain, muitala Nordsletta.
Ealgga goddán
Oddleif Nordsletta lohká dán gumppe johtán dáluid gaskkaid ihkku Šuošjávrris, ja lea sullii leamašan dihtosis gos gumpe lei.
– Lei ealgga goddán Vuottašjoga ala, ja go de fáhttiimet dan ealgga luhtte, de njuolggehii luodda, go lei ballan. Lei árvideames ealgga alde go bođiimet, muitala Nordsletta.
Ii dieđe agi
Oddleif Nordsletta ii loga vel diehtit man boaris dát gumpe lea, ja galget iskosiid váldit ovdal go agi sáhttá muitalit.
– Dát lei mealgat stuorát go ovddit, lei deahkkát. Eambbo in sáhte dál muitalit, lohká Nordsletta.