Fefo DOARJU Protect Sápmi
Fefo direktevra: – Muhto mii eat vuordde ahte dan dihte galget min beali váldit sisabahkkenáššiin
Gaskavahku mearridii Fefo stivra doarjut ruđalaččat Protect Sápmi vuođđudusa vihtta jagi ovddos guvlui, oktiibuot 1,5 miljovnnain.
Fefo lea stivračoahkkima doallan Čáhcesullos mannan gaskavahku. Doppe leat sii earret eará meannudan ášši mas Protect Sápmi lei ohcan 2.5 miljovdnasaš doarjaga Fefos. Ulbmil doarjagiin lea beassat ásahit beaivválaš jođiheaddji virggi Protect Sápmi vuođđudussii.
Fefo direktevra lei evttohan ahte sii dorjot 300 000 ruvnnuin jahkái vihtta jagi, oktiibuot 1.5 miljovnnain.
Fefo stivra doahttalii dan, ja mearridedje doarjut 300 000 ruvnnuin jahkái, muhto sii bidje ovtta eavttu dasa. Doarjja galgá árvvoštallot guovtti jagi geahčen.
Beaivválaš jođiheaddji
Ulbmil árvvoštallamiin lea ahte Fefo áigu oaidnit lea go Protect Sámi doarjja doaibman nu go galgá. Fefo direktevra, Jan Olli čilge ná:
– Mii áigut oaidnit ahte doarjja doaibmá, ja guovtti jagi geahčen mii de árvvoštallat galgat go joatkit doarjagiin, lohká son. – Mii lea dat eaktu maid árvvoštallabehtet?
– Earret eará jus ii leat beaivválaš jođiheaddji virgáduvvon. Diehttelasat 300 000 ruvnnuin ii nagot virgádit beaivválaš jođiheaddji, muhto mii oaivvildit ahte dat lea veahkkin oktan eará ruhtagálduin olihit dan mihtu, lohká son.
Protect Sápmi
Protect Sápmi vuođđudusa váldoulbmil lea hukset ja doalahit fágalaš, nanu ja profeššunealla organisašuvnna vai sáhttet fállat veahki sámi vuoigatvuođalaččaide areálaberoštumiid dáfus, eananja resursavuoigatvuođaid ja maid ovdánanvejolašvuođa dáfus. Vuođđudus galgá maid fállat gelbbolaš ráđiid ja veahki, ja maid leat mielde šiehtadeame sámi beroštumiid ovddas.
Oažžut doaibmat
Fefo direktevra ii loga sin das ballat, go Protect Sápmi galgá veahkehit earret eará gelbbolašvuođain ja šiehtadallamiiguin sisabahkkemiin sámi guovlluide, ahte sii šaddet Protect Sámiin goabbat beallái beavddi.
– Min ulbmil lea ahte áššit, main leat sámi beroštumiid mat galget vuhtii váldot, ahte sii geat leat dan dilis, ožžot buoremus vea- hki. Ii leat nu ahte mii cakkadit beroštumiid oažžut buoremus lágiin ovdan iežaset oainnuid ja vahágiid, lohká Olli. – Lehpet go oastán dál alccedet buoredáhtolašvuođa Protect Sápmi vuođđudusas?
– Dat ii leat min ulbmil, nu go dadjen, de mii addit vejolašvuođa berošteddjiide buori vuođul buktit ovdan iežaset oainnu ja vahága, nu go sisabahkkemiid oktavuođas, lohká Olli.
Dárbu doarjagii
Protect Sápmi vuođđudusa stirrajođiheaddji, Nils Henrik Sara, lea diehttelas ilus go leat ožžon doarjaga.
– Dat buktá sihkkaret boahtteáiggi midjiide, ja dakko bokte diehttelasat maid sámi beroštumiide, lohká son.
Balat go ahte doarjaga bokte dii gieđahallabehtet Fefo litnáseappot jus šaddabehtet šiehtadallat áššiin main Fefo lea din vuostebealli?
– Dan gal in bala. Mis lea min bargu man doaimmahit buoremus lágiin barggu beroštumiid ovddas geat min leat váldán veahkkin bargat áššiin, leaš dal Fefo dahje gii min vuostebealli. In ge jáhke Fefo bealis dan oba vurdet ge, lohká Sara.