VÁLDÁN ATNUI ođđa váibmomášiinnaid
Guovdageaidnu lea Norgga stuorámus suohkan areála ektui ja ruovttubálvalusa bargiin leat danne guhkes mátkkit beaivválaččat. Danne oidnet dárbbu dan golmma váibmomašiidnii mat sidjiide leat addon.
Moadde vahkku dás ovdal bohte Guovdageainnu ruovttubálvalussii golbma váibmomašiinna ja golbma heahteseahka.
– Dain heahteseahkain lea earret eará oksygena jus lea lossat vuoigŋat. Leat maid hávvedikšumii reaiddut, lieggarátnu, disprin nammasaš bierggas mii boahtá ávkin jus lea váibmodohppehat, ja eará smávva heahteveahkkediŋgga, muitala ruovttubálvalusa doaimmajođiheaddji, Guro Nordgaard Siri.
Mašiinnat leat juo sajis ja buot praktihkalaš barggut leat dahkkon. Juovlamánu 1. beaivvi rájes leat gergosat geavahišgoahtit daid.
Oaidnán dárbbu daidda
Guovdageaidnu lea Norgga stuorá- mus suohkan areála ektui ja ruovttubálvalusas leat danne guhkes mátkkit. Danne oidnet ruovttubálvalusas dárbbu daidda mašiinnaide.
– Ruovttubálvalus lea guhkes mátkkiin, ii ge goasse dieđe mainna deaivvada go boahtá pasieanttaid ruovttuide. Daid háviid go deaivvada dakkáriiguin geaiguin manná hejot, de leat oaidnán ahte livčče galgan álkes reaiddut maiguin sáhttá gieđahallat dilálašvuođa dassái go doavttir dahje ambulánsa boahtá, čilge Nordgaard Siri.
– Jus ruovttubálvalusa bargit leat vuojašeamen márkanis, de leat dávjá pasieantta luhtte ovdal go ambulánsa dahje doavttir, lasiha dearvvašvuođa ja fuolahusa suohkanjođiheaddji, Kent Ailo Haetta.
Stuora suohkanis ii soaitte ambulánsa olámuttos álo
Go Guovdageainnus eai leat go guokte ambulánsa, de geavvá ahte ambulánsa ii leat olámuttos go heahti deaivida.
– Jurdda dainna lea ahte jus ambulánsa ii leat márkanis go rukses alárbma čuodjagoahtá, dat alárbma mii muitala ahte mii galgat vuoddját, de fertet mii dollet. De fertet mii vuoddját vaikko ii leat min pasieanta. De leat mii pasieantta luhtte dassái go doavttir ja ambulánsa boahtá, čilge Nordgaard Siri.
Nanne fáhkkatlaš gearggusvuođa
Buot bargit ruovttubálvalusas leat leamaš kurssas mii bisttii beaivvi nu ahte leat gergosat deaivvadit vaikko mainna.
– Lea Norsk luftambulanse mii lágida dán, geat addet reaidduid. Dát ii leat geatnegahtton, muhto lea hui buorre fálaldat, dadjá Haetta.
Kent Ailo Haetta muitala ahte Mázes juo lea máŋga jagi leamaš dakkár fálaldat.
– Doppe lea hui stuora dárbu dasa, nu ahte lea dárbu dakkár jovkui dáppe Guovdageainnus maid. Dat nanne fáhkkatlaš gearggusvuođa.
Guro Nordgaard Siri deattuha ahte dát ii man ge ládje boađe Máze vuosttašheahteveahkkejoavkku sadjái.
– Máze vuosttašheahteveahkkejoavku gal ain bissu, muhto mii váldit reastta suohkana. Mii orrut stuora suohkanis, nu ahte lea dárbu. Danne leat ge mis dál golbma dakkár seahka, nu ahte sáhttit sáddet daid golmma guvlui.
Mearkkašahtti gelbbolašvuođalokten
Dát fálaldat, mii boahtá ambulánssa sadjái jus dat ii leat olámuttos, soaitá dagahit giliolbmuid eambbo oadjebassan. – Dát dagaha maid mearkkašahtti gelbbolašvuođaloktema go ruovttubálvalusas dál lea dát vejolašvuohta, juoga mii fas addá buoret fálaldaga giliolbmuide. Oažžu veahki jođánit vaikko ambulánsa ii soaitte olámuttos. Go mii diehtit ahte ambulánsa ii buot áiggiid leat márkanis, jus lea tuvra eará guvlui, dadjá Nordgaard Siri.