Stáhta láhtte de go olmmošboranis gumpe nuorra boazosápmelaččain
Dál gáibida Norgga stáhta ahte Jovsset Ante Sara unnida iežas ealu. Dan čállá Aftenposten aviisa. Diibmá lea ge Alimusriekti mearridan ahte Sara galgá njuovvat 350 heakkas 75 heggii. Muhto dán áššis ii leat maŋemus sátni celkon, go Jovsset Ánte Sara lea guoddalan ášši olmmošvuoigatvuođakomitea i. Doppe ii leat vel ášši meannuduvvon, muhto stáhta, Eanandoallodirektoráhta bokte, ii doahttal dan. Sii jotket dan nuorra boazodoalli oaguheami de go nealgegumpevalvi ja hámsot su ovttaláhkai de go olmmošboranis gumpe. Dan ii sáhte eará láhkái govvidit sániiguin, go nu fasttit láhtte stáhta Jovsset Ánte Sarain.
Norgga Eanandoallodirektoráhta Liv Berit Haetta lohká ge Aftenposten aviisii ahte Sara ášši lea mannan buot Norgga riektevuogádagaid čađa, ja dál lea lunddolaš álggahit doaimmaid vaikko ON olmmošvuoigatvuođakomitea leage meannudeame ášši. Son dadjá iežaset oaivvildit, ahte dat lea riekta, go eatnašat leat juo njuovvan gáibiduvvon alimus boazolohkui ja bággonjuovvan lea maŋemuš čoavddus das, lohká Haetta aviisii. Lea oalle suorggahahtti oaidnit dákkár cealkámušaid stádabargis Sara vuostá, go dan dihtet stáhtaeiseválddit seamma bures go buohkat earát, ahte stuorra oassi sámi servodadagas ja álbmogis eai doarjjo dan duomu. Dan dihte go duopmu čielgasit rihkku olmmošvuoigatvuođaid sámi oainnu mielde, ja dan seamma oainnus lea maid stuorat eanetlohku Sámedikkis, mii lea sápmelaččaid iežaset álbmotválljejuvvon orgána. Dan berre stáhta, sihke politihkalaččat ja ámmátlaččat, doahttališgoahtit.
Sáhttá ge roahkkat dadjat dan láhkai, ahte Norgga stáhta lea Norgga Alimusrievtti fámuin čađahan «juridihkalaš goddima» Jovsset Ánte-áššis. Danne vuordit ja gáibidit čielgasit, ahte boazodoalloeiseválddit bissehit daid áitagiid dassážii go ášši lea meannuduvvon ON olmmošvuoigatvuođakomiteas. Muđui berrejit dál maid eiseválddit oalát bissehit dáin áššiin oaguheames boazosámiid, go stuorra oassi sápmelaččain dáhttot olles boazodoallolága rievdadit. Dađi bahábut eai leat eiseválddit seamma oainnus, muhto Sámediggi ovttas Norgga Boazosápmelaččaid Riikkaservviin leat ieža álggahan dan barggu. Dan birra lea ge leamaš seminára Álttás. Dát lea juo čielga signála stádii ahte boazodoalloláhka ii doaimma sámiid iežaset riekteáddejumi mielde, nu ahte dan ferte rievdadit vai das šaddá buoret doarjja sámi servodagas. Muđui šaddá stáhta doaruhit láhkačorvviiguin eambbo sápmelaččaid badjelbávtti vai oččoše iežaset miela miel. Lea ge váttis ipmiridit manne stáda oaivvilda beare ollu bohccuid Finnmárkkus go seammás diktet stuorra huksemiid álggahit boazoguohtoneatnamiidda.
Muđui šaddá stáhta doaruhit láhkačorvviiguin eambbo sápmelaččaid badjel bávtti vai oččoše iežaset miela miel.