Dollet juovlakonsearttaid
Unjárgga ja Deanu koarra UNTAK lea dál doallagoahtán juovlakonsearttaid goappaš suohkaniin.
Koarra dieđiha preassadieđáhusas ahte sii lávlot árbevirolaš juovlalávlagiid sihke sámegillii ja dárogillii, muhto maiddái ođđa lávlagiid. Sis leat maid ollu dievddut mielde koaras ja sáhttet dalle fállat albma dievdokoarralávluma. Lassin sis leat čeahpes solisttat ja gitárain čuojaha Sten Gøran Olsen.
Sis lei vuosttaš konsearta mannan lávvordaga Várjjaga sámi museas. Das viidáset sis lea plánas doallat konsearttaid juovlamánu 4. beaivvi Deanu dearvvašvuođa- ja fuolahusguovddážis ja eahkedis ges Buolbmát girkus dii. 19, juovlamánu 11. beaivvi dollet konsearttaid Unjárggas dearvvašvuođaguovddážis ja eahkes Unjárgga girkus dii. 19.00. Maŋemus konseartta dollet Juovlavuona girkus juovlamánu 16. beaivvi dii. 18.00.
UNTAK lea máŋggakultuvrralaš seahkalaskoarra mii álggahuvvui 1991:s. Sin buktagat speadjalastet dan guovtti suohkana máŋggabealat kultuvrra, gos sámi árbevirolaš musihkas lea stuorra mearkkašupmi. Lassin lea Suoma ja Ruošša kultuvra oassin sin máŋggakultuvrralaš duogážis.
Koarra doallá konsearttaid goappaš suohkana dearvvašvuođa- ja fuolahusguovddážiin juohke jagi. Juohke nuppi jagi sii oassálastet koarrafestiválain dahje deaivvadit eará koaraiguin. Sii leat leamaš earret eará Lulli-áfrihkas, Islánddas, Irlánddas ja Murmánskkas.