Imašta suollagiid dagu
Viessoeaiggáda mielas lea ártet go suollagat leat gillen boarrres vistái gaikut.
– Eai leat dieđusge diehtán ahte dáppe eai leat dávvirat main lea árvu. Olbmot geat dákkár daguid dahket leat árvideames biergasiid ozus maid besset jođánit vuovdit, lohká Oskar Eriksen.
Beassi mieleaiggáda Oskar Eriksena mielas lea ilgat ja suhttadahtti go biergasat eai bálle ráfis. Lávvardaga fuomášii son ahte glássa lei cuovkanan Beassi visttis guovdu Kárášjoga márkana. Son/ sii guhte leat cuvken gláse suoládedje dihtora, muđuid ii loga Oskar Eriksen su dieđus eará jávkan.
Politiijat dárkkistan
Vuossárgga iđida bohte politiijat dárkkistit báikki. Oskar Eriksen muitala iežas dieđihan seammás politiijai go fuomášii mii lea dáhpáhuvvan. Ávvir lei báikkis go politiija lei dárkkisteamen, muhto son ii háliidan kommenteret ášši.
Eai oaidnán árvvu duojis
Beassis leat ollu sámi duojit ja dáidagat main lea stuorra árvu, muhto sii geat leat fitnan siste Beassis, leat diktán daid orrot.
– Eai leat oaidnán árvvu sámi duojis ja dáidagis. Ii mis leat mihk kige muđuid mas lea stuorra árvu dáppe, lohká Eriksen.
Liigebargu ja golut
Son muitala sisagaikun dagaha sidjiide liigebarggu, ja lohká 10 jagi leat bállen ráfis.
– Lea liigebargu, golut ja dárbbašmeahttun bargu maid leat dál guođđán dása, lohká son ja čujuha glássabihtáide ja glássa mii lea cuovkanan.
Ávvir lea geahččalan oažžut ságaide Kárášjoga ja Porsáŋggu leansmánne Tarjei Mathiesen, muhto eat leat lihkostuvvan.