– Boaranat vigge cakkadit
Rolffa buohtastahttá dálá luohtedigaštallama dainna go go rock’n roll čuožžilii ja oaivvilda ahte luohti ferte maid ovdánit, vai sámi artisttat olihit viidábut.
NRK prográmma «Muitte mu» lea buktán olu digaštallama, maŋŋel go dovddus artista, Sara Marielle Gaup Beaska, cuiggodii NRK Sámi luođi addán dáččaide ja rivguide dainna prográmmain.
Son lei luohteoahpaheaddji go «Muitte mu» prográmma álggii diibmá.
Son lohká NRK čuohppan sáddaga nu ahte son aivve rámpui Elisabeth Andreassona nu čeahppin juoigat, vaikke son duohtavuođas dajai ahte lei eambbo lávlla go luohti dat maid Andreasson ovdanbuvttii.
Banana Airlines
Dan rájes lea NRK Sámi prográm- majođiheaddji, Ole Rune Haetta, dadjan ahte «Muitte mu» luođit leat liikká luođit go máŋgga sámi artisttas ja rockejoavkkus leat. Dan lea Sančuari njunuš, Heaika Haetta, dorjon ja gohčodan muhtun sámi artisttaid luđiid dego Banana Airlines luohtin, ja seamma dásis go «Muitte mu» luođit. Ii goabbáge leat mannan nu guhkás ahte nammejahkii cuige juste daid artisttaid geaid luohtedássi lea Banana Airlines dahje «Muitte mu» muttos.
Ovdánit
Musihkkár Rolf Morten Amundsen, dahje Rolffa, lohká ahte luohti maid ferte ovdánit, vai olihit viidábut dainna.
– Luohti lea mu mielas dál hui áigeguovdil, ja olihan maid lea viidábut go ovdal. Mu mielas lea buorre go «Muitte mu» prográmma hui positiivvalaččat lea rahpan luohtái geainnu dábálaš olbmuide máilmmis. Dan bokte ávkkástallet maid sámi artisttat, go luohti šaddá dovddusin. Jus luohti ii ovdán, de dat duššá ja jávká, ja dan eat hálit, lohká son.
Rolffa mielas orru šaddan dál luođi dilli dego dološáigge go rock’n roll čuožžilii. Dalle ledje maid vuostálastit dasa, muhto liikká dat čuožžilii go dasa gávdnojedje guldaleaddjit.
– Dalle vigge maid boaranat cakkadit dan ahte musihkka galgá rievdat nu ahte šaddá rock’n roll, jus álkes vugiin dajan. Muhto dat čuožžilii, ja nu leage dál mu mielas luohti maid ovdáneame. Bohtet ođđa šáŋŋerat das maid, lohká son.
Šáŋŋerat
Son lohká iežas ovttaoaivilis Felgen orkestera Morten Ailo Haetta Hanseniin, ahte luođis leat šaddan dál eambbo šáŋŋerat go dušše luohti.
– Luohti lea issoras dološ árbevierru, muhto dál leat maid das čuožžilan iešguđetlágan šáŋŋerat. Dat leat partyluohti, man mun ráhkadan, ja muhtun muddui Felgen maid, dasto gávdno heavyluohti, ja maid dábálaš árbevirolaš luohti. Dat muitala ahte luohti ovdána, nu go visot eará musihkka maid, lohká son.
– Mii lea dovdomearka nu go partyluođis?
– Na dat galgá geahppasit mannat, ja álki oahppat. Dasa galgá musihkka álot. Árbevirolaš luođis leat olu mohkit, ja dat mohkit fertejit vai hervejit luođi go dušše jiena geavaha. Dan eai dárbbaš partyluođis leat, lohká son.
– Deaivvahalat go don Ole Rune Haetta ja Heaika Haetta čuoččuhusaide?
– Lea váttis ahte ii deaivvahallat, go soai han eaba arvva namuhit daid geaid oaivvildeaba juoigat Banana Airlines ja «Muitte mu» dásis. Ferten iežan bealis lohkat dan ahte mun iešmielat ráhkadan luđiid maid lea álki oahppat ja álki juoigat guldaleddjiide, go dat galgá dahkat ahte guldaleaddjit leat mielde ráhkadeame šovva. Mii leat várra dakko bokte ráhkadan ođđa luohtešáŋŋera, partyluođi, lohká son
Diktet geavahuvvot
Rolffa ii loga iežas gal bajidit dan dássái ahte árvvoštallat leat go «Muitte mu» prográmmas luođit vai eai.
Son baicca lea ilus go dovddus Norgga artisttat diktet iežaset geavahuvvot prográmmas go luđiin vigget olihit dáčča ja rivgu.
– Vuosttažettiin vuos ráhkadit Tv-sáddaga luđiin, ja seammás geahččalit olihit Norgga stuoraservodaga dainna vai sámi servodat oažžu ipmárdusa sis ja maid ovdanbuktet sámi musihkkaárbevieruid olles Norgii, lohká son vel loahpas.